Kámelettik jasqa tolmaǵandarǵa arnalǵan kolonııalar jumysy ońtaılandyrylýda
ASTANA. 22 aqpan. QazAqparat - Qazirgi tańda Almaty, Aqtóbe, Óskemen jáne Petropavl qalalarynda tárbıeleý kolonııalary jumys istep jatyr, olarda 231 kámeletke tolmaǵan sottalǵandar ustalýda, dep habarlady QR Ádilet mınıstrligi Qylmystyq-atqarý júıesi komıtetiniń baspasóz qyzmetinen.
Sońǵy úsh jylda qylmys sanynyń azaıýy baıqalady. Osyǵan oraı, qylmystyq-atqarý júıesin reformalaý men qylmystyq zańnamany izgilendirý aýqymynda 2011 jyldyń birinshi jartysynda atalmysh mekemelerdiń jumysyn ońtaılandyrý josparlanǵan.
Atap aıtqanda, endi tórt tárbıeleý kolonııalarynyń ornyna Almaty qalasynda 350 oryndyq bir kolonııa qurylmaq.
Qylmystyq-atqarý júıesi komıtetiniń málimetinshe, sottalǵan kámelettik jasqa tolmaǵan jasóspirimderdi halyqaralyq standarttarǵa jaqyndatylǵan jaǵdaılarda ustaý tárbıeleý isiniń sapasyn arttyrady. Onyń birneshe sebepteri bar. Birinshiden, Almaty qalasy respýblıkanyń mádenı ortalyǵy bolyp tabylatyndyqtan, bul ótkiziletin mádenı-tanymdyq baǵdarlamalardyń sanyn arttyrýǵa jol ashpaq. Ekinshiden, aımaqtyń klımattyq jaǵdaıy qolaıly. Úshinshiden, Almaty qalasynyń LA-155/6 tárbeleý kolonııasynda «Informatıka» páni boıynsha respýblıkalyq olımpıada ótkizý tájirıbesi bar. Bolashaqta halyqaralyq mamandardy tartý arqyly fýtbol oıynyn úıretý josparlanǵan.
Sonymen qatar qamaýdan keıingi jastardyń qoǵamǵa beıimdelýin tezdetý maqsatynda psıhologııalyq-túzetý sharalary kesheni qarastyrylǵan.
Almaty qalasyndaǵy tárbıleý kolonııasy bolashaqta QR-nyń kámeletke tolmaǵandarǵa arnalǵan jalǵyz mekemesi bolmaq.
