Kámelettik jasqa tolmaǵan kólik urlaýshy ustaldy
ALMATY. Shildeniń 2-si. QazAqparat - Almaty oblysy Qaskeleń aýdanynyń kámelet jasyna tolmaǵan jetkinshegi kólik urlaýmen aınalysqan. Azız esimdi bozbalany tek qana «Jıgýlı» markaly kóligi qyzyqtyrǵan jáne de ol, urlaǵan kólikteriniń barlyǵyn tek óziniń úıine ǵana aıdap alyp kelip otyrǵan, dep habarlaıdy qalalyq ІІD baspasóz qyzmetinen.
«Ol eń alǵashqy qylmysyn eki apta buryn Áýezov aýdanynda ornalasqan turǵyn úı mańynda jasaǵan. «Jıgýlı» avtokóliginiń esigin ońaı ashqan ol, kólikti aıdap alyp ketken. Bala jastan-aq ákesiniń janynda júrip, kólik jasaýdyń qyr-syryn meńgergen Azızge kólik esikterin buzyp ashyp alý esh qıyndyq týǵyzbaǵan. Ol urlanǵan kólikterdi jınap, qosalqy bólshek retinde satyp, paıda tappaq bolǵan», - dep atap ótti Almaty qalasy ІІD Jol polıtsııa basqarma bastyǵynyń orynbasary polıtsııa polkovnıgi Muhtar Túsúpov.
Al ótken jeksenbi kúni qoldy bolǵan kólik ıesi temir tulparynyń urlanǵany týraly tez arada polıtsııaǵa habar berý arqasynda urlanǵan kóligine qaıta qoly jetti. Qala boıynsha jarııalanǵan «Quryqtaý» arnaıy is-sharasy qylmyskerdiń izin sýytpaı qolǵa túsirýge múmkindik berdi.
«Qylmyskerdiń meken-jaıyna kelip jetken Áýezov aýdandyq ishki ister basqarmasynyń kyzmetkerleri men Jol polıtsııasy basqarmasynyń izdestirý bóliminiń mamandary tergeý amaldaryn júrgizdi. Qylmyskerdiń úıiniń aýlasynda budan buryn da urlanǵan avtokólik pen qosalqy bólshekter tabyldy. Al jas jetkinshektiń ata-anasy balasynyń qylmys jasap júrgeninen múlde beıhabar bolyp shyqty. Ol barlyq urlanǵan kólikterdi dostaryna tıesili ekenin aıtyp áke-sheshesin aldap kelgen. Atqarylǵan tergeý amaldarynan keıin urlanǵan kólikter óz ıelerine qaıtaryldy», - dep málimdedi Muhtar Túsipov.
