Kámeletke tolmaǵandarǵa qatysty jynystyq qylmystarǵa jaza qataıtyldy
NUR-SULTAN. QazAqparat – Kámeletke tolmaǵandarǵa qatysty jynystyq qylmystardyń jazasy kúsheıtildi. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«Memleket basshysy Qazaqstan halqyna Joldaýynda kámeletke tolmaǵandarǵa qatysty jynystyq qylmystar úshin jazany qatańdatýdy tapsyrǵan bolatyn. Keıbir zańnamalyq aktilerge tıisti ózgerister ázirlenip, Parlamenttiń qaraýyna engizildi. Bıylǵy 11 qańtardan bastap, bul ózgerister zańdy kúshine endi. Osylaısha, balalarǵa qarsy jasalatyn jynystyq sıpattaǵy qylmystyń kez kelgen túrine jaýapkershilik qatańdatyldy», - dedi resmı ókil mınıstrlikte ótken onlaın brıfıngte.
Kámeletke tolmaǵandarǵa qatysty jynystyq qylmys jasaǵany úshin sanktsııalar kúsheıtildi.
«Máselen, Qylmystyq kodekstiń 120-baby «Zorlaý» qylmysy boıynsha aıtar bolsaq, tómengi shegi 15 jyldan 17 jylǵa deıin bas bostandyǵynan aıyrýǵa ózgertildi. Ata-anasynyń, ógeı ákesiniń, pedagogtiń osyndaı qylmysqa barǵany úshin sanktsııa 17 jyldan 20 jylǵa deıin ulǵaıtyldy. Buryn bul norma boıynsha 12-17 jyl bekitilgen edi», - deıdi N. Oraz.
Osyndaı ózgerister Qylmystyq kodekstiń 121, 122, 123, 124, 134,144, 312-baptaryna da engizildi.
«Bul bastama kámeletke tolmaǵandarǵa qatysty jasalatyn zorlyq-zombylyq áreketteri men qylmystardy aýyzdyqtaıdy degen úmit bar», - deıdi Nurdildá Oraz.
Aıta keteıik, jyl basynan beri 6484 qylmys jasaldy, onyń 4321-i táýlik ishinde ashyldy.
