Kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııanyń otyrysy ótti
ASTANA. 19 sáýir. QazAqparat - 18 sáýirde Qazaqstan Respýblıkasy Bilim jáne ǵylym mınıstri Baqytjan Jumaǵulovtyń tóraǵalyǵymen Qazaqstan Respýblıkasy Úkimetiniń janyndaǵy Kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııanyń kezekti toǵyzynshy otyrysy ótti,
dep habarlady vedomstvonyń baspasóz qyzmetinen.
Vedomstvoaralyq komıssııa Kámeletke tolmaǵandardy beıimdeý ortalyqtarynyń qyzmetin uıymdastyrý máselelerin qarastyrdy.
Sonymen qatar balalar men jasóspirimder arasyndaǵy sýıtsıdtik minez-qulyqtyń aldyn alý máselesi komıssııa jumysynda keńinen talqylandy.
Vedomstvoaalyq komıssııa otyrysyna qatysýshylar bul másele boıynsha kámeletke tolmaǵandarǵa psıhologııalyq jáne medıtsınalyq qyzmet kórsetý, jastar densaýlyq saqtaý ortalyqtaryn qurýdy jáne otbasylyq psıhoterapııa jumysyn jandandyrýdy usyndy.
Sondaı-aq taǵy bir mańyzdy máseleniń biri - Bala quqyqtary týraly konventsııa men Qazaqstan Respýblıkasynyń zańdary kepildik berip otyrǵan balalardy jumyspen qamtý, kámeletke tolmaǵandarǵa arnalǵan áleýmettik-demalys ınfraqurylymyn damytý jáne balalardyń demalý quqyǵyn saqtaý máselesi de sóz boldy.
Respýblıkanyń qosymsha bilim beretin 620 uıymynyń úıirmeler men sektsııalarda balalardyń 21,6 paıyzy qamtylǵan. 101 244 kámeletke tolmaǵandardyń bos ýaqyty 428 aýla klýbynda uıymdastyrylǵan.
Búgingi kúni balalardyń demalysyn uıymdastyrý máselesi de olardyń rýhanı mádenıetin, joǵary moraldyq jáne azamattyq sapasyn damytýǵa yqpal etýde.
Vedomstvoaalyq komıssııa otyrysyna qatysýshylar sábıler úıleriniń qyzmetin jetildirý problemasyna da jiti nazar aýdardy. Otyrysta qaralǵan barlyq máseleler boıynsha Qazaqstan Respýblıkasy Úkimetine usynystar engiziledi. Sonymen qatar ortalyq jáne jergilikti atqarýshy organdarǵa Kámeletke tolmaǵandardy beıimdeý ortalyqtarynyń, sábıler úıleriniń qyzmetterin jetildirý, kámeletke tolmaǵandar arasyndaǵy sýıtsıdtik minez-qulyqtyń profılaktıkasy jáne onyń aldyn alý, qosymsha bilim berý uıymdarynda balalardyń bos ýaqyttaryn ótkizýge jaǵdaı jasaý týraly naqty usynystar berildi.
Komıssııanyń otyrysyna Qazaqstan Respýblıkasy Bas prokýratýrasynyń, Bilim jáne ǵylym, Іshki ister, Ádilet, Eńbek jáne halyqty áleýmettik qorǵaý mınıstrlikteriniń, Statıstıka agenttiginiń, úkimettik emes uıymdardyń ókilderi, oblystyq, Astana jáne Almaty qalalary ákimderiniń orynbasarlary qatysty.
