Kámeletke tolmaǵandardyń qaýipsizdigine qatysty zań jobasynda balalardy otbasynan alyp ketý qarastyrylǵan ba
ASTANA. KAZINFORM – Májilistiń qaraýyndaǵy kámeletke tolmaǵandardyń qaýipsizdigi týraly zań jobasynda balalardy otbasynan alyp ketý máselesi qarastyrylmaǵan.
Atap aıtqanda, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasy men ilispe qujat birinshi oqylymda qaraldy. Otyrys barysynda elimizde balany otbasynan ajyratý qandaı jaǵdaıda bolatyny suraldy.
«Áleýmettik jelilerdi saralaı kele, jurtshylyq zań jobasynda ıývenaldy ıýstıtsııa normalary qamtylǵanyna, otbasyna kedergisiz kirýge ruqsat etilgenine, balalardy otbasynan alyp ketýge jáne olardy balalar úıine tapsyrýǵa qatysty normalar bar dep alańdap otyrǵanyn baıqadyq. Zań jobasyn qarap shyqtym, biraq ondaı normalardy tappadym. Zań jobasynda mundaı normalar bar ma? Jalpy, qazir Qazaqstanda balany otbasynan alyp ketýge bola ma?», - dep surady depýtat Sergeı Ponomarev.
Atalǵan zań jobalary boıynsha baıandama jasaǵan Májilis depýtaty Juldyz Súleımenova qarastyrylǵan qujattarda ıývenaldy ıýstıtsııaǵa baılanysty eshqandaı norma engizilmegenin aıtty.
«Qarastyrylýy múmkin de emes. Nege? Sebebi biz balanyń otbasynda tárbılengenin, óskenin qalaımyz. Sonymen qatar, aldaǵy ýaqytta jetimder úıi sekildi ınstıtýtynyń birtindep joıylýyna kúsh salamyz. Búgin talqylanǵan zań jobasynda balalardy otbasynan alyp ketý máselesi qarastyrylmaǵan», - dedi J. Súleımenova.
Óz kezeginde Oqý-aǵartý vıtse-mınıstri Edil Ospan qarastyrylǵan zań jobalarynda balalardy otbasynan májbúrli alyp ketý normalary usynylmaǵanyn rastady.
«Bul másele mınıstrlikte qaralmady. Sondyqtan áleýmettik jelilerde taralyp jatqan qaýeset shyndyqqa janaspaıdy», - dedi E.Ospan.
