Kámeletke tolmaǵandar isteri jónindegi komıssııalardyń qyzmeti jańartyldy
ASTANA. KAZINFORM – Elimizde kámeletke tolmaǵandardyń isteri jáne olardyń quqyqtaryn qorǵaý jónindegi komıssııalardyń qyzmetine qatysty jańa erejeler kúshine endi. Bul týraly Oqý-aǵartý mınıstrligi habarlady.
Qazirgi ýaqytta óńirlerdegi komıssııalar jańartylǵan tártip boıynsha jumysy jasaýda. Qujat Memleket basshysy Qasym-Jomart Toqaev 2025 jylǵy 30 jeltoqsanda qol qoıǵan «Quqyq buzýshylyqtyń aldyn alý týraly» Zańdy iske asyrý maqsatynda 2026 jylǵy 30 naýryzda qabyldandy.
Ótken jylǵy kórsetkishter komıssııa qyzmetin jańartýdyń ózektiligin aıqyndaıdy. Máselen, 2025 jyly elimizde 4,1 myńǵa jýyq otyrys ótti. Bul kórsetkish 2024 jylmen salystyrǵanda 3,7%-ǵa artyq. Qaralǵan ister sany 26,7%-ǵa artqan, bul derekter komıssııalardyń qyzmeti jandanǵanyn kórsetedi. Sonymen qatar, ómirlik qıyn jaǵdaıdaǵy otbasylarǵa qatysty isterdiń úlesi 17,1%-ǵa azaıǵan. Búginde respýblıka boıynsha 274 komıssııa jumys isteıdi. Bul komıssııalar- óńirlik deńgeıde bala quqyqtaryn qorǵaý salasynda sheshim qabyldaıtyn birden-bir vedomstvoaralyq organ.
— Jańa erejeler memlekettik organdar men uıymdar arasyndaǵy ózara is-qımyldy kúsheıtýge jáne balalardyń quqyqtary men zańdy múddelerin qorǵaý tıimdiligin arttyrýǵa baǵyttalǵan. Qujatta respýblıkalyq deńgeıden bastap aýdandyq jáne aýyldyq deńgeıge deıingi komıssııalardy qalyptastyrý tártibi naqty aıqyndalǵan. Olardyń quramyna bilim berý, densaýlyq saqtaý, ishki ister, áleýmettik qorǵaý salalarynyń ókilderi, psıhologtar, qoǵamdyq uıymdar jáne Bala quqyqtary jónindegi ýákilder kirdi, — delingen mınıstrlik habarlamasynda.
Komıssııalardyń negizgi mindetteri — balalardyń quqyqtary men zańdy múddelerin qorǵaý, olardy qalpyna keltirý, quqyq buzýshylyqtardyń sebepteri men jaǵdaılaryn anyqtaý, qaraýsyzdyqtyń, býllıngtiń, zorlyq-zombylyqtyń jáne qoǵamǵa jat minez-qulyqtyń aldyn alý.
— Erejelerde materıaldardy qaraý tártibi, sheshim qabyldaý merzimderi, otyrysqa kámeletke tolmaǵandardyń jáne olardyń zańdy ókilderiniń qatysý mindettiligi, sondaı-aq balalarǵa jáne olardyń ata-analaryna qatysty qoldanylatyn sharalar naqty reglamenttelgen. Sonymen qatar, ómirlik qıyn jaǵdaıdaǵy balalardy erte kezeńde anyqtaý, olardy áleýmettik ońaltý jáne qoldaý kórsetý máselelerine erekshe nazar aýdarylǵan. Bul rette bala quqyqtaryn qorǵaý salasyndaǵy ýákiletti organdar men laýazymdy tulǵalardyń derbes jaýapkershiligi kúsheıtildi, — delingen habarlamada.
Jańa erejeler komıssııalar jumysynyń júıeliligi men ashyqtyǵyn qamtamasyz etip, kámeletke tolmaǵandar arasyndaǵy quqyq buzýshylyqtardyń aldyn alý tıimdiligin arttyrýǵa jáne árbir balanyń quqyqtaryn keshendi qorǵaýǵa múmkindik beredi.
Aıta ketelik mektepter men kolledjderde «DosbolLIKE» antıbýllıngtik baǵdarlamasy júzege asyrylyp jatqany týraly jazǵan edik.
