Kámeletke tolmaǵandar isteri jónindegi komıssııa jumysyna ózgeris engiziledi
ASTANA. KAZINFORM – Qazaqstanda kámeletke tolmaǵandardyń isteri jáne olardyń quqyqtaryn qorǵaý jónindegi komıssııalar belsendi jumys júrgizip jatyr.
Oqý-aǵartý mınıstrliginiń málimetinshe, osy jyldyń toǵyz aıynda 30 myńnan astam balaǵa komıssııa jumysy aıasynda qajetti kómek kórsetildi. Qoldaý bilim alýǵa qoljetimdilikti, psıhologııalyq, quqyqtyq jáne áleýmettik kómekti, sondaı-aq ońaltý is-sharalaryn qamtydy.
Búgingi tańda elimizde balalar quqyqtarynyń buzylýynyń aldyn alý jáne olarǵa kómek kórsetý boıynsha memlekettik organdar men uıymdardy úılestirýde negizgi ról atqaratyn 235 komıssııa qyzmet etedi.
Olardyń jumys tıimdiligin arttyrý úshin 2024 jyly normatıvtik bazaǵa eleýli ózgerister engizý josparlanýda. Onyń ishinde jaǵdaıdy basqarý (keıs-menedjment) jáne medıtsınalyq-áleýmettik esepke alý modelin engizý bar.
«Otbasyn qoldaý ortalyqtarymen ózara is-qımylǵa erekshe nazar aýdarylatyn bolady. Bul qıyn ómirlik jaǵdaılardaǵy balalardy jáne olardyń otbasylaryn keshendi súıemeldeýdi qamtamasyz etýge múmkindik beredi. Sondaı-aq, oblystyq, qalalyq jáne aýdandyq komıssııalar arasyndaǵy ózara árekettesýi naqty ajyratylatyn bolady. Bul balalardyń quqyqtaryn qorǵaý júıesiniń jalpy tıimdiligin arttyrady jáne memlekettik basqarý deńgeıleri arasyndaǵy is-qımyldardy úılestirýdi jaqsartyp, muqtaj balalarǵa kómek kórsetýdi aıtarlyqtaı jyldamdatady», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Atalǵan sharalar balalardyń quqyqtaryn qorǵaý júıesin nyǵaıtýǵa jáne ómirlik qıyn jaǵdaıǵa tap bolǵan árbir balaǵa ýaqytyly, sapaly kómekti qamtamasyz etýge baǵyttalǵan.
Bıyl 9 aıda balasyna durys tálim-tárbıe bere almaǵan 345 adam ata-ana quqyǵynan aıyrylǵanyn jazǵan bolatynbyz.
