Kámeletke tolmaǵandar isteri jónindegi komıssııa jyl basynan beri 7 myńnan astam isti qarady
ASTANA. KAZINFORM – 2025 jyldyń basynan beri Kámeletke tolmaǵandar isteri jáne olardyń quqyqtaryn qorǵaý jónindegi komıssııalar shamamen 4 myń otyrys ótkizip, 7 myńnan astam isti qarady.
Onyń ishinde myńnan astam is ómirlik qıyn jaǵdaıǵa tap bolǵan otbasylarǵa qatysty. Mundaı otbasylarǵa materıaldyq, psıhologııalyq, quqyqtyq jáne medıtsınalyq kómek kórsetilip, sonymen qatar jumyspen qamtýǵa, emdelýge, balalardyń oqýyna jáne demalysyn uıymdastyrýǵa járdem kórsetiledi.
Búginde elimizde balalardyń quqyqtaryn qorǵaý, quqyqbuzýshylyqtyń aldyn alý jáne otbasylardy qoldaý baǵytynda memlekettik organdardyń ózara is-qımylyn úılestiretin 271 komıssııa jumys atqarýda. Olar josparly máselelerden bólek, qoǵamda keń talqylaý týǵyzǵan jáne jedel sheshimdi qajet etetin isterdi de qaraıdy.
«Kámeletke tolmaǵandar isteri jónindegi komıssııalar – balalardyń quqyqtaryn qorǵaýdyń basty tetigi. Komıssııalardyń qyzmeti qıyn jaǵdaıǵa tap bolǵan otbasylardy der kezinde anyqtap, olarǵa qajetti kómek kórsetýge múmkindik beredi. Biz vedomstvoaralyq ózara is-qımyldy kúsheıtip, býllıngtiń, kıberbýllıngtiń jáne sýıtsıdtik minez-qulyqtyń aldyn alý baǵytynda jańa tásilder engizýdemiz», – dedi Balalardyń quqyqtaryn qorǵaý komıtetiniń tóraǵasy Nasymjan Ospanova.
Quqyq qorǵaý organdarymen birlesip júrgizilgen vedomstvoaralyq reıdterdiń nátıjesinde balalardy tárbıeleý jónindegi mindetterin oryndamaǵan 21,8 myńnan astam ata-ana, túngi ýaqytta kámeletke tolmaǵandardyń turǵyn úıden tys jerde bolýyna jol bergen 107 myńnan astam zańdy ókil, sondaı-aq oıyn-saýyq oryndaryna balalardy kirgizgen 2 myńǵa jýyq kásipker ákimshilik jaýapkershilikke tartyldy.
Qazirgi ýaqytta komıssııalardyń jumysyn jetildirýge baǵyttalǵan jańa erejeler ázirlenýde. Qujatta býllıngtiń, kıberbýllıngtiń jáne sýıtsıdtik minez-qulyqtyń aldyn alý, zertteý júrgizý jáne óńirlerge ádistemelik qoldaý kórsetý baǵyttaryndaǵy ókilettikterdi keńeıtý kózdelgen. Jańartylǵan format komıssııalardyń tıimdiligin arttyryp, jergilikti deńgeıdegi jaýapkershilikti kúsheıtýge múmkindik beredi.
Aıta keteıik, ІІM kámeletke tolmaǵandardy esirtki qylmysyna tartýǵa qarsy baqylaýdy kúsheıtti.