Kámeletke tolmaǵandar arasynda quqyqbuzýshylyqtar sany 60 paıyzǵa azaıǵan
ASTANA. KAZINFORM — Elimizdiń ár óńirinde Balalardyń quqyqtaryn qorǵaý basqarmalary ashylady. Jyl basynan beri Astana qalasyndaǵy atalmysh basqarma óz jumysyn bastap ketken. Bul jóninde qalalyq kommýnıkatsııalar qyzmetinde ótken brıfıngte aıtyldy.
Jańa basqarmanyń negizgi mindeti – balalardyń quqyqtary men zańdy múddelerin qorǵaý isin júıeleý. Sondaı-aq quqyqbuzýshylyqtardyń aldyn alý, olardy erte anyqtaý jáne qalpyna keltirý sharalaryn úılestirý. Bul bastama QR Prezıdenti Ákimshiligi men Balalar quqyqtary jónindegi ýákildiń usynysymen júzege asqan.
— Basqarma bilim berý, densaýlyq saqtaý, áleýmettik qorǵaý, mádenıet jáne sport salalarynda balalar múddesine baǵyttalǵan memlekettik saıasatty iske asyrady. Sonymen qatar balalar quqyqtarynyń saqtalýyn baqylaý jáne qabyldanǵan sharalardyń tıimdiligine monıtorıng júrgizý basqarmanyń quzyretine kiredi. Kámeletke tolmaǵandarǵa qatysty qorǵanshylyq jáne qamqorshylyq fýnktsııalaryn oryndaýǵa erekshe nazar aýdarylady. Basqarma profılaktıkalyq jumystardy uıymdastyryp, ómirlik qıyn jaǵdaıdaǵy balalardy jeke súıemeldeıdi, - dedi Astana qalasynyń Balalardyń quqyqtaryn qorǵaý basqarmasynyń basshysy Serik Ádilbaev.
Búgingi kúni elordada 545 myńnan astam bala turady. Jyl saıyn bul kórsetkish 20 myńǵa jýyq ósip keledi. Sondyqtan bas qalada ómir súrip jatqan ár balanyń qaýipsizdigi mańyzdy. Osy tusta basqarma jasóspirimderge qatysty zorlyq-zombylyq jáne tıisti kútim bolmaǵan ýaqytta jedel áreket etedi. Sondaı-aq kámeletke tolmaǵan balalardyń isteri men olardyń quqyqtaryn qoldaý úshin arnaıy súımeldeý jumystary júrgiziledi.
— Qazirgi tańda basqarmanyń súıemeldeýinde shamamen 3 000 bala bar, jyl basynan beri 700-den astam kámeletke tolmaǵan balaǵa barý júzege asyrylǵan, 300-ge jýyq bala psıhologııalyq kómek aldy, al ishki ister organdarynda esepte turǵan 160 balaǵa jeke keıs-menedjment aıasynda súıemeldeý júrgizilip keledi, - dedi Serik Ádilbaev.
Kezekti spıker Erkin Janabil elordadaǵy quqyqtyq ahýalǵa toqtaldy.
Onyń aıtýynsha, kámeletke tolmaǵandar arasynda quqyqbuzýshylyqtar sany 60,6 paıyzǵa tómendegen. Alaıda balalarǵa qatysty qylmystar 5,6 paıyzǵa artqan eken.
— Osy jyldyń naýryz aıynda kámeleket tolmaǵandardyń qatysýymen 113 tirkelip, onyń saldarynan 113 bala zardap shekken. Osy baǵytta turaqty negizde jastar arasynda profılaktıkalyq sharalar júrgizilip jatyr. Qıyn ómirlik jaǵdaıǵa tap bolǵandarǵa jáne qolaısyz, áleýmettik osal toptarda tárbıelenip jatqan balalarǵa kómek jiti kórsetilip jatyr, - deıdi Astana qalasy Polıtsııa departamenti Qoǵamdyq qaýipsizdik basqarmasy bastyǵynyń orynbasary Erkin Janabil.
Aıta keteıik, Qazaqstanda bala quqyǵyn qorǵaıtyn keıs-menedjer laýazymy engiziledi.
