Kámeletke tolmaǵan sottalýshylardy tártiptik ızolıatorlarǵa toǵytýǵa tyıym salý kerek - S. Bychkova
ASTANA. QazAqparat - Kámeletke tolmaǵan sottalýshylardy tártiptik ızolıatorlarǵa toǵytýǵa tyıym salý kerek. Búgin Májilistegi Zańnama jáne sot-quqyqtyq reformalar komıtetiniń keńeıtilgen otyrysynda jańa redaktsııadaǵy Qylmystyq-atqarý kodeksiniń jobasyn talqylaý barysynda depýtat Svetlana Bychkova osyndaı pikir bildirdi.
«Jańa redaktsııadaǵy kodeks jobasynyń kámeletke tolmaǵandardy tártiptik ızolıatorlarǵa ornalastyrý týraly normasy úlken pikirtalas týdyrady. Bul rette halyqaralyq quqyq aıasynda «golland erejesi» atalatyn qamaý oryndarynda ustalatyn balalarǵa qatysty ereje buzylǵaly otyr», - deıdi depýtat S.Bychkova.
Onyń paıymynsha, bul jerde áńgime negizinen Almaty qalasynyń arnaıy mekemelerinde ustalatyn isti bolǵan júzdegen balalarǵa qatysty bolyp tabylady.
«Sondyqtan da, bizge eń bastysy máseleniń ońtaıly sheshimin tabý kerek. Toqtala ketetin jaıt, aǵymdaǵy jyly Birikken Ulttar Uıymynyń Balalar quqyǵy jónindegi komıtetine Qazaqstanǵa qatysty arnaıy baıandama daıarlanatyn bolady. Al kámeletke tolmaǵandary tártiptik ızolıatorlarda ustaý máselesi buǵan deıin de BUU Azaptaýlarǵa qarsy kúres máseleleri jónindegi negizgi baıandamashysy Manfred Novak tarapynan eskertilgen bolatyn. Sondyqtan, buǵan nazar aýdarýymyz kerek», - deıdi S. Bychkova.
