Kámeletke tolmaǵan Ózbekstan azamattary eńbekke zańsyz tartylǵan - prokýratýra
ASTANA. QazAqparat - Almaty qalasy Túrksib aýdany prokýratýrasy zańsyz kóshi-qonǵa qarsy reıdtik is-sharalar barysynda 3 qurylys nysanynda qajetti ruqsaty joq 32 Ózbekstan azamatynyń eńbekke tartylǵandyǵyn anyqtady.
Olardyń arasynda kámelet jasqa tolmaǵandar da bar. Bul týraly qalalyq prokýratýranyń baspasóz qyzmetinen habarlandy.
Osyǵan oraı, kóshi-qon zańnamasynyń buzylýy derekteri boıynsha prokýratýra aýdandyq ishki ister basqarmasyna zań buzýshylyqty joıý týraly usynys engizgen. Ony qaraý nátıjesinde Ózbekstan Respýblıkasynyń 32 azamatyn Qazaqstan Respýblıkasynyń ákimshilik quqyqbuzýshylyqtar týraly Kodeksiniń 394 baby 3 bóligi boıynsha ákimshilik jaýapkershilikke tartý úshin ákimshilik ister mamandandyrylǵan aýdanaralyq ákimshilik sotyna joldandy. Sonymen qatar, tıisti ruqsattary joq, ıaǵnı zańsyz eńbek mıgranttaryn jumysqa tartqan jumys berýshilerge jaýapkershilik qaralady. Olarǵa shetel azamattarynyń eńbek kúshin jumysqa tartý tártibin buzǵany týraly aıyp taǵylyp otyr.
