Kámeletke tolmaǵan qylmyskerlerdiń jartysyna jýyǵy - mektep oqýshylary
ASTANA. 13 qańtar. QazAqparat - Kámeletke tolmaǵan qylmyskerlerdiń jartysyna jýyǵy - mektep, gımnazııa men lıtseı oqýshylary. Búgin Parlament Májilisinde ótip jatqan Úkimet saǵatynda baıandama jasaǵan QR Іshki ister mınıstri Qalmuhanbet Qasymov osylaı málimdedi.
Mınıstr keltirgen málimetterge qaraǵanda, ótken jyly kámeletke tolmaǵandardyń krımınaldyq belsendiligi biraz tómendegen. Atap aıtqanda, kámeletke tolmaǵandar qylmysy segiz paıyzǵa azaısa, jasóspirimder qylmysynyń sany tórt paıyzǵa deıin kemigen. «Degenmen, kámeletke tolmaǵan qylmyskerlerdiń jartysyna jýyǵy - mektep, lıtseı men gımnazııa oqýshylary. Sondyqtan biz jasóspirimdermen jáne jastarmen profılaktıkalyq jumystyń edáýir ónimdi nysany bolyp tabylatyn «mektep» ınspektorlary ınstıtýtyn damytýǵa kúsh salyp jatyrmyz. Olar túsindirý jumysyn júrgizýdi atqaryp, esirtki men pornografııa ónimderiniń taralýyn anyqtaıdy, urlyq pen jasóspirimder arasyndaǵy tóbelesterge jol bermeıdi. Búginde 1783 «mektep» ınspektorlary qyzmet etip jatsa, olardyń jetispeýshiligi 1600-di quraıdy», - deıdi mınıstr Q. Qasymov. Budan bólek, vedomstvo basshysy kámeletke tolmaǵan quqyq buzýshylarǵa arnalǵan arnaıy mektepterdiń jetispeýshiligine de nazar aýdardy.
