Kámeletke tolmaǵan qyzylordalyq túngi klýbta azot oksıdi quıylǵan shar satqan
QYZYLORDA. KAZINFORM — Qyzylorda qalasyndaǵy túngi klýbtardyń birinde azot oksıdi quıylǵan sharlardyń ashyq túrde satylyp jatqany týraly habarlama tústi. Bul týraly departamenttiń baspasóz qyzmeti jetkizdi.
Oblystyq polıtsııa departamenti esirtki qylmysyna qarsy is-qımyl basqarmasynyń qyzmetkerleri prokýratýra organdarynyń úılestirýimen habarlama negizinde reıdtik is-shara júrgizdi.
— Reıd barysynda túngi klýbtan 10 lıtrlik 4 gaz ballony jáne polıetılen paketke salynǵan 6 shar anyqtalyp, zattaı dáleldeme retinde alyndy. Qylmystyq kodekstiń 301-babyna sáıkes (ýly zattardyń, sondaı-aq esirtki, psıhotroptyq zattardy, sol tektesterdi nemese ýly zattardy daıyndaý nemese qaıta óńdeý úshin paıdalanylatyn zattardyń, qural-saımandardyń nemese jabdyqtardyń zańsyz aınalymy) qylmystyq is qozǵalyp, tergeý bastaldy.
Klýb qyzmetkeri kámelet jasyna tolmaǵan eken, sondyqtan onyń zańdy ókilderine qatysty tıisti ákimshilik hattamalar rásimdeldi, — delingen habarlamada.
Tártip saqshylary demalys kúnderi kúsheıtilgen rejımde jumys istep, barlyq oıyn-saýyq ornynda profılaktıkalyq tekserý júrgizip keledi.
Jýyrda biz Astananyń birqatar kóńil-kóterý mekemesinde 20-dan astam azot totyǵy ballony anyqtalyp, tárkilengenin jazǵanbyz.