Kámeletke tolmaǵan azamat ıelik etetin turǵyn úıdi qalaı satýǵa bolady
ASTANA. KAZINFORM – Kámeletke tolmaǵan bala tolyq nemese úlestik menshik quqyǵymen ıelik etetin turǵyn úıdi satý qarapaıym notarıaldyq rásimmen júzege aspaıdy. Zań mundaı jaǵdaılarda balanyń múddesin qorǵaýdy basty orynǵa qoıady.
Qazaqstanda kámeletke tolmaǵandar jyljymaıtyn múlikke ártúrli jolmen ıelik etýi múmkin. Mysaly, muragerlik nemese syıǵa tartý arqyly. Sondaı-aq bala turǵyn úıdiń belgili bir úlesine ıelik etýi yqtımal.
18 jasqa deıin bala óz betinshe turǵyn úıdi sata almaıdy. Mundaı quqyq zań boıynsha berilmeıdi. Alaıda jas ereksheligine baılanysty rásim tártibi ózgeredi.
14 jasqa deıin balanyń atynan mámileni ata-anasynyń biri nemese zańdy ókili jasaı alady. Bul jaǵdaıda kelisimshartqa ata-ana qol qoıady jáne qujatta onyń bala atynan áreket etip otyrǵany mindetti túrde kórsetiledi.
14 pen 18 jas aralyǵyndaǵy jasóspirimder mámileni ata-anasynyń nemese zańdy ókilderiniń kelisimimen jasaıdy. Kelisimshartqa jasóspirimniń ózi qol qoıady, al janynda ata-anasynyń biri (nemese ókili) kelisim beretinin kórsetip qol qoıady. Eger ata-anasy bolmasa, zańdy ókil retinde ájesi, atasy, aǵa-ápkeleri qatysa alady.
Sonymen qatar ata-ananyń kelisiminen bólek, Qazaqstanda qorǵanshylyq jáne qamqorshylyq organynyń ruqsaty qajet. Bul talap turǵyn úıdi satý, aıyrbastaý, kepilge qoıý nemese jalǵa berý jaǵdaılaryna qatysty, ıaǵnı bala tolyq nemese úlestik menshik ıesi bolǵan barlyq jaǵdaıda qoldanylady. Ruqsatty onlaın túrde nemese qorǵanshylyq organdaryna tikeleı júginý arqyly alýǵa bolady.
Erekshe jaǵdaı retinde 16 jasqa tolǵan kámeletke tolmaǵan azamat tolyq áreketke qabiletti dep tanylýy múmkin. Eger ol eńbek sharty boıynsha jumys istese nemese zańdy ókilderiniń kelisimimen kásipkerlik qyzmetpen aınalyssa, mámilelerdi óz betinshe jasaýǵa quqyly. Mundaı emansıpatsııa qorǵanshylyq organy sheshimimen, al kelispeýshilik bolǵan jaǵdaıda sot arqyly rásimdeledi.
Buǵan deıin erli-zaıyptylardyń kelisiminsiz jasalǵan mámilelerdiń satyp alýshylar men satýshylar úshin qandaı táýekelder týdyratyny týraly habarlanǵan edi.