Kámeletke tolmaǵan balanyń jalǵyz ushýy – ne bilý kerek
ASTANA. KAZINFORM – Buǵan deıin 6 jastan asqan balalar shetelge ata-anasyz usha alatynyn aıtqan edik.
Kámeletke tolmaǵan jolaýshy eresek adamnyń ilesýinsiz ushý úshin ne isteý kerek? Ushaqpen ata-anasyz saparlaıtyn bala úshin kim jaýap beredi? Air Astana mamandary túsindirdi.
– Áýe kompanııasynyń qyzmetine balany ata-anasy nemese zańdy qamqorshysy áýejaıda jóneltý úshin bergen sátten bastap, kútip alýshy adammen mejeli áýejaıda kezdeskenge deıin alyp júrý kiredi, – deıdi áýe kompanııasynyń qyzmetkerleri KazInform tilshisine bergen suhbatynda.
Balalardy eresekterdiń ertýinsiz ushaqqa otyrǵyzý úshin áýe kompanııasymen kámeletke tolmaǵandardy alyp júrý týraly kelisimge otyrý kerek. Avıatasymaldaýshylardyń resmı saıtynda usynylǵan kelisim úlgisin aldyn ala júktep alyp, úıde toltyrýǵa bolady. Sondaı-aq, bul qujatty ushýǵa tirkelý kezinde áýejaıdaǵy áýe kompanııasy qyzmetkerleri de usynady.
«Ereseksiz bala» qyzmetiniń talaptary:
- Ushaq bıletin satý agenti arqyly brondaý kezinde jeteleýshisi joq balalardy alyp júrý qyzmetin surańyz;
- Suranysyńyzdyń rastalǵanyna kóz jetkizińiz;
- Bıletti reıske deıin keminde 24 saǵat buryn satyp alyńyz;
- Halyqaralyq reısterde 2 saǵat buryn jáne ishki reısterde 1,5 saǵat buryn qujattardy tekserý jáne tirkeý úshin erte kelińiz (jeteleýshisi joq balany qarsy alýshy da erte kelýi kerek);
- Kámeletke tolmaǵandardy alyp júrý týraly kelisimdi tikeleı reıster úshin tórt danada jáne tranzıttik reısterge alty danada toltyryp, ózińizben birge alyp kelińiz;
- Balańyzda tirkeý jáne otyrǵyzý úshin barlyq qajetti qujattardyń bar ekenine kóz jetkizińiz.
Eskertý!
Eger balany áýejaıǵa alyp baratyn nemese kútip alatyn adam onyń ata-anasy nemese resmı qamqorshysy bolmasa, onda bul adamǵa balamen jol júrýge ruqsat etilgeni týraly ata-anasy nemese qamqorshysy notarıýs arqyly rásimdelgen senimhat berýi kerek.
Air Astana qyzmetkerleri «Ereseksiz bala» qyzmetin paıdalanar kezde eskerý kerek birneshe máselege toqtaldy.
– Balany shyǵaryp salýshy eresek adam reıs ushqanǵa deıin áýejaıda qalýy kerek. Kidirister bolǵan jaǵdaıda, ol jeteleýshisi joq bala úshin ushý ýaqytyna deıin jaýap beredi. Oǵan qosa, shyǵaryp salýshy adam balanyń óz qol júgin óz betinshe alyp júre alatynyna kóz jetkizýi kerek. Nemese ol joljúk retinde rásimdelýi qajet. Balanyń ózimen birge alyp ketetin zattardy daıyndaý kezinde joljúkte jáne qol júkte qaýipti zattardy tasymaldaýǵa shekteýler bar ekenin eskerý kerek. Sondaı-aq, jeteleýshisi joq balaǵa bıletti «bazalyq» tarıfpen emes, bagajdy tegin alyp júrý normasyn qamtıtyn tarıfpen satyp alýdy usynamyz, – deıdi mamandar.
Áýe kompanııasynyń qyzmetkerleri eresekterdiń jeteleýinsiz ushaqqa otyrǵan balaǵa qaýipsizdik maqsatynda ystyq sýsyndardyń berilmeıtinin eskertti. Biraq bılet qunyna qatysty birqatar jeńildikter qarastyrylǵan.
– Іshki reısterde 6–14 jas aralyǵyndaǵy balalar eresekterge arnalǵan tolyq tarıfke 50% jeńildik alady. Sizge týý týraly kýálikti jáne jeteleýshisi joq balalardy alyp júrý týraly kelisimdi usyný qajet. Al halyqaralyq reısterde 6–11 jas aralyǵyndaǵy balalar eresekterge arnalǵan tolyq tarıfke 25% jeńildik alady. Balalarǵa 12 jastan bastap eresekterge arnalǵan tolyq tarıf qoldanylady. Balanyń shekaradan óz betinshe ótýi úshin sizge tólqujat, týý týraly kýálik jáne ata-ananyń nemese qamqorshynyń notarıaldy kýálandyrylǵan kelisimi qajet, – deıdi Air Astana qyzmetkerleri.
Alaıda, balalar kez kelgen halyqaralyq reısterde jalǵyz usha almaıdy.
– Eger sizdiń balańyz Almatydan Astana arqyly Frankfýrtqa ushatyn bolsa, alańdamańyz – áýe kompanııasy oǵan tolyq qamqorlyq kórsetedi. ıAǵnı bala ushý barysynda jalǵyz qalmaıdy. Astana áýejaıyna kelgende ony arnaıy qyzmetkerler qarsy alyp, basqa reıske otyrǵyzǵanǵa deıin únemi ertip júredi. Bul qyzmet – eresek adamnyń ertýinsiz sapar shegetin balalarǵa arnalǵan. Biraq tranzıt ýaqyty shektelgen: Almaty–Astana–London baǵyty boıynsha kútý ýaqyty 2,5 saǵattan, al Almaty–Frankfýrt, Frankfýrt–Almaty nemese London–Almaty baǵyttarynda 2 saǵattan aspaýy tıis, – deıdi mamandar.
Aıta keteıik, Iran áýe keńistiginiń ýaqytsha jabylýyna baılanysty búgin halyqaralyq reıs oryndaǵan birneshe ushaq Ózbekstan astanasyndaǵy qosalqy áýejaılarǵa qondy.