Kámelet jasyna tolmaǵan 70-ten astam aqtóbelik qyz júkti bolyp qaldy
AQTÓBE. QazAqparat – Aqtóbede stýdentter men dárigerler kezdesýinde erte júktilik, jastar arasyndaǵy qylmys týraly aıtyldy, dep habarlaıdy QazAqparat tilshisi.
Kolledj stýdentteri búgin psıholog, gınekolog, polıtsııa qyzmetkeri men dermatolog mamanǵa ashyq suraq qoıdy. Stýdenttermen kezdesý oblystyq densaýlyq saqtaý basqarmasy men «Arasan Aqtóbe» JShS uıymdastyrýymen ótti. Stýdentter erte júktilik, jastar arasyndaǵy qylmys, shylym shegýdiń zııany men uıaly baılanystyń áseri týraly jan-jaqty suraq qoıdy.
«Jyl ótken saıyn kámeletke tolmaǵandar arasyndaǵy erte júktilik azaıyp keledi. Bul - qýantarlyq jaǵdaı. Degenmen problema sol kúıi qalyp otyr. Máselen, Estonııada mundaı derek múlde tirkelmeıdi. Jastar, jasóspirimder dárigerge qaralyp, keńes alýdan qoryqpaýy tıis. Biz muǵalim emespiz, eshkimge jekip, uryspaımyz. Oblysta sanaýly ǵana maman bolǵan soń barlyq jasóspirimdi baqylap, qamtı almaımyz. Sondyqtan kez kelgen ýaqytta dárigerdiń esigi ashyq, bári tegin. Oblys boıynsha kámeletke tolmaǵan 70-ten astam qyz júkti bolyp qaldy», - dedi balalar men jasóspirimder gınekology Saltanat Tobylbaeva.
Kezdesý kezinde turmystyq zorlyq-zombylyq týraly da aıtyldy. Oblysta ótken toǵyz aı ishinde 2993 turmystyq zorlyq-zombylyq tirkeldi.
«9 aıdyń qorytyndysy boıynsha 2993 turmystyq zorlyq-zombylyq deregi tirkeldi. Ótken jyly dál osy kezde 2626 oqıǵa bolǵan. ıAǵnı, ósim bar. Áıelderdi uryp-soǵý boıynsha 502, áıelderge qatysty jasalǵan 259 qylmys tirkeldi», - dedi Aqtóbe oblystyq polıtsııa departamenti Áıelderdiń quqyǵyn qorǵaý jónindegi ınspektor Aqgúl Esenǵalıeva.
