Kámelet jasqa tolmaǵandarǵa qatysty jynystyq qylmys jasaǵandarǵa jazany qatańdatý kerek - ІІM
ASTANA. QazAqparat - Qazaqstanda pedofılderge medıtsınalyq kastratsııa jasaý jazasyn engizý máselesi qaralyp jatyr. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR ІІM Tergeý departamenti bastyǵynyń orynbasary Berik Qojamberdıev málim etti.
«Bizde qazir birqatar máseleler bar, olar zańnamalyq turǵyda sheshimin tabýy tıis. Onyń qatarynda kámelettik jasqa tolmaǵandarǵa qatysty jynystyq qylmys jasaǵandarǵa jazany qatańdatý, olarǵa qatysty medıtsınalyq kastratsııa qoldanýdy zańdastyrýǵa deıin barýymyz shart. Mundaı sharalar Frantsııa, Belgııa, Polsha, Izraılde qoldanylýda. Osy másele qazir qaralyp jatyr. Jumys toby bar. Menińshe osyndaı shara bizde de bolýy kerek», - dep atap ótti ol. Eske sala keteıik, bunyń aldynda habarlaǵanymyzdaı, bıyldyń ózinde balalarǵa qatysty zorlyq boıynsha 726 fakti tirkeldi. Byltyr osy merzimde 485 qylmys tirkelgen bolatyn.
