Kámelet jasqa tolmaǵan eki bala «Atyraý-Astana» jolaýshylar poıyzyna «qastandyq» jasamaq bolǵan
ASTANA. QazAqparat - 8 mamyr kúni saǵat 23.13-te «Atyraý-Astana» baǵytyndaǵy jolaýshylar poıyzynyń mashınısti temir jol boıynda bógde zattardyń ornalasýy saldarynan «Maılıno-Tobyl» ótkelinde poıyzdy shuǵyl tejegen, dep habarlady Kóliktegi ІІD baspasóz qyzmetinen.
Anyqtalyp otyrǵandaı, «Maılıno-Tobyl» ótkelinen 676 shaqyrym jerde temir jol boıynda árqaısysynyń uzyndyǵy bir metrdeı temir betondy úsh baǵan men uzyndyǵy bir shaqyrym jol kórsetkish jatqany anyqtaldy.
Kólik polıtseıleri júrgizgen jedel-izdestirý is-sharalarynyń barysynda kámelet jasyna jetpegen eki jasóspirim anyqtalyp, ustaldy. Olar Lısakovsk qalasy Oktıabrsk aýylynyń 11 jáne 16 jastaǵy turǵyndary. Olardyń aıtýynsha, temir jol boıyna baǵandardy qoıyp, poıyzdyń toqtaıtynyn nemese toqtamasyn bilgileri kelgen.
Atalǵan fakt QR QK 350-babynyń 1 tarmaǵy (Kólik quraldaryn nemese qatynas joldaryn qasaqana jaramsyzdyqqa keltirý) boıynsha sotqa deıingi tergeýdiń biryńǵaı tiziliminde tirkeldi.
Qazirgi ýaqytta tergeý amaldary júrgizilýde.
Aıta keteıik, jyl basynan beri 400-den asa shuǵyl tejeý faktisi tirkelgen, sonyń ishinde temir jol boıynda bógde adamnyń bolýyna baılanysty - 247, temir jol boıynda jeke menshik maldyń júrýine baılanysty - 169, temir jol boıynda bógde zattardyń ornalasýy saldarynan - 3.
