Kámelet jasqa tolmaǵan balalardy meshit ishinde uryp-soqqan aqtóbelik sottaldy
AQTÓBE. KAZINFORM – Sot qala turǵynyn 1 jyl 6 aıǵa bas bostandyǵynan aıyrý jazasyn kesti. Ol buǵan deıin úıqamaqta boldy.
Oqıǵa bıyl aqpan aıynda boldy. Nur-Ǵasyr oblystyq ortalyq meshitinde sózge kelip qalǵan sottalýshy kámelet jasqa tolmaǵan balalardy uryp-soǵyp, tepkilegen. Saldarynan bir balanyń mıy shaıqalyp, bas-mı jaraqatyn aldy. Sot-medıtsınalyq saraptama qorytyndysyna súıensek, jaraqaty jeńil jáne ortasha dárejede. Sot jaryssózi kezinde memlekettik aıyptaýshy Albına Asqarova sottalýshyny kináli dep tanyp, bas bostandyǵynan aıyrý jazasyn surady.
- Judyryqtap, aıaǵymen tepken. Densaýlyqqa qasaqana aýyrlyǵy ortasha zııan keltirý qylmysyn aqyryna deıin jetkizgen. Sottalýshynyń zańsyz is-áreketi saldarynan bas mıynyń shaıqalýy, jabyq bas mı jaraqaty, jeńil dárejedegi bas mıynyń soǵylýy dıagnozy qoıyldy. Densaýlyǵyna orta dárejede zııan keltirgen. Muryn súıeginiń jabyq synyǵy túrindegi jaraqaty – jeńil dárejede. Sottalýshyny kináli dep tanyp, oǵan Qylmystyq kodekstiń 293-baby 1-bóligi boıynsha 1 jylǵa , 107-baby 2-bóligi 2, 5, 8-tarmaqtarymen 1 jyl 6 aıǵa bas bostandyǵynan aıyrý jazasyn taǵaıyndaýyńyzdy suraımyn. Qylmystyq kodekstiń 58-baby 2-bóligine sáıkes túpkilikti 1 jyl 6 aıǵa bas bostandyǵynan aıyrý jazasyn taǵaıyndaýdy suraımyn. Jábirlenýshiniń talap aryzy ishinara qanaǵattandyrylyp, ókildik qyzmetterine jumsalǵan aqsha qarajaty tolyǵymen ótilsin. Sonymen qatar azamattyq talap aryzdy aqylǵa syıymdy mólsherde óndirýińizdi suraımyn,- dedi memlekettik aıyptaýshy.
Sotta sottalýshy úıqamaqta júrgen soń keshirim de suraı almaǵanyn aıtty. Tek sot zalynda ǵana múmkindigi bolǵan.
- Aıaǵyma bilezik taǵyp qoıdy. Úıden eshqaıda shyǵa almaımyn. Baryp keshirim suraıtyndaı múmkindik bolǵan joq. Tańerteń ýchaskelik ınspektor keldi, prokýratýradan da tekserdi. Men eki jábirlenýshiden keshirim suraımyn, istegen isime ókinemin. Azamattyq talap aryzdy moıyndamaımyn. Úıdegi ata-anamnyń jalǵyz asyraýshysymyn,- dedi sottalýshy.
Sot úkimimen sottalýshy túpkilikti 1 jyl 6 aıǵa bas bostandyǵynan aıyryldy.
- Jaza taǵaıyndaǵan kezde sottalýshynyń kórineý qylmystyq quqyqbuzýshylyq jasaǵany, ol áreketterdi qoǵamdyq orynda, ıaǵnı meshitte jasaǵany eskerildi. Jábirlenýshi 10 mln teńge moraldyq zııandy talap etti. Sot moraldyq zııanǵa 3 mln teńge, zańdy ókildiń shyǵynyna 200 myń teńge óndirýdi durys dep tapty,- dedi sýdıa Mırash Ýrazalına.
Sot úkimi zańdy kúshine engen joq.
Eske salsaq, terrorızmdi nasıhattaǵan aqtóbelik 8 jylǵa bas bostandyǵynan aıyryldy.
