Kámelet jasqa tolmaǵan aqtóbelik jalǵan aqparat berdi - ІІD
AQTÓBE. QazAqparat - Aqtóbedegi «Kerýen» saýda oıyn-saýyq keshenine «jarylǵysh zat qoıyldy» dep habarlama taratqan adamnyń kim ekeni belgili boldy. Oblystyq ishki ister departamenti telefon arqyly aqparat bergen adamnyń kámelet jasqa tolmaǵan bala ekenin anyqtady, dep habarlaıdy QazAqparat tilshisi.
Búgin jergilikti saǵat 09:40-ta «102» nómirine «Kerýen» saýda oıyn-saýyq keshenine jarylǵysh zat qoıyldy degen aqparat túsken. Keıin oqıǵa ornyna quqyq qorǵaýshylar men arnaıy jasaq jedel jetti. Ǵımarat ishi men jan-jaǵyn tintý kezinde eshqandaı da kúdikti zat tabylmady.
«Jedel izdestirý kezinde polıtsııa qyzmetkerleri telefon shalǵan adamdy anyqtady. Ol Aqtóbe qalasynyń kámelet jasqa tolmaǵan turǵyny bolyp shyqty. Bala ata-anasyna qaıtaryldy. Oqıǵa biryńǵaı reestrge tirkelip, tergeý jumystary bastaldy. Qylmystyq kodekstiń «Terrorızm aktisi boıynsha jalǵan habarlama berý» baby boıynsha qylmystyq is qozǵaldy. Qazirgi ýaqytta ata-anany ákimshilik jaýapkershilikke tartý máselesi qaralyp jatyr», - dep habarlady oblystyq ІІD baspasóz qyzmeti.
Aıta keteıik, Qylmystyq kodekstiń «Terrorızm aktisi boıynsha jalǵan habarlama berý» baby aıasynda 6 jylǵa deıin bas bostandyǵynan aıyrý nemese 1 mıllıon teńge aıyppul tóleý jazasy qarastyrylǵan.
