Kámelet jasynan asqan erekshe azamattardy kúndiz qaraıtyn memlekettik ortalyqtar ashylýy múmkin
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaev múgedektigi bar balalardyń kútiminen bosamaıtyn analardy jetkilikti zeınetaqymen qamtýdyń jańa tásili engiziletinin aıtty.
- Qazir mentaldy aýytqýy bar bala baǵyp otyrǵan analarǵa eki túrli járdemaqy bar. Osy eki járdemaqyny qyzmet kórsetý sanatyna aýystyrǵymyz kelip otyr. Nege ekenin túsindireıin. Ana ondaı balany baqqany úshin járdemaqy alsa, zeınet jasyna jetkende eńbek ótili bolmaǵandyqtan memleket oǵan eń tómengi zeınetaqy ǵana tóleıdi. Ondaıǵa jol bermeý úshin eki járdemaqyny qyzmet kórsetý sanatyna aýystyrý týraly usynys ázirledik. Sonda óz balasyna qyzmet kórsetkeni úshin eńbek ótili júredi, zeınetaqy aýdarymdary men áleýmettik aýdarym tólenedi. Osylaısha zeınet jasyna kelgende jaqsy zeınetaqy taǵaıyndalady. Bul 1 toptaǵy múgedektigi bar balalarǵa qatysty. Zeınet jasy 63 jas dep eseptelgen, - dedi ol.
Aıtýynsha, bul sheshim jyl aıaǵyna deıin kúshine enedi.
- Al bala 18-ge tolǵannan keıingi jaǵdaıǵa kelsek, ıá, otbasy tek múgedektik boıynsha ǵana járdemaqy alyp júr. Bul baǵytta birneshe joba qarastyrylyp jatyr. Úkimettik emes uıymdar jasy 18-den joǵary múgedektigi bar adamdarǵa arnalǵan ortalyqtar qurýdy usynǵan. Tańerteń otbasy sol jerge ákelip tastap, keshke qaıta úıge ákelip otyratyndaı tártip bolady. Osynyń arqasynda onyń kútimine jaýapty ana kúndiz birneshe saǵat jumys isteı alady. Inklıýzıvti saıasat tujyrymdamasynda osyndaı joba bar. Biraq onyń shyǵyny barshylyq. Qazir ákimdiktermen kelissóz júrip jatyr. Almatyda osyndaı joba iske qosylady. Osy jobany búkil elge taratý máselesi pysyqtalyp jatyr. Kelesi jyly da osy baǵytta jumys isteımiz. Ýaqyt bar, - dedi vıtse-mınıstr.
Sondaı-aq ol Oljas Bektenov jeke kompanııalardy muqtaj adamdardy qoldaýǵa shaqyrdy.
