Kamchatkadaǵy jer silkinisinen keıin Klıýchevskaıa Sopka janartaýy atqylaı bastady

ASTANA. KAZINFORM — Kamchatkadaǵy joıqyn jer silkinisinen keıin Klıýchevskaıa Sopka janartaýy atqylaı bastady, dep habarlaıdy Reseı ǵylym akademııasynyń Geofızıkalyq qyzmeti Kamchatka fılıalynyń Telegram-arnasyna silteme jasap.

— Qazirdiń ózinde Klıýchevskıı atqylap jatyr, — delingen habarlamada.

Ótken aptada qutqarýshylar Avachınskıı, Bezymıannyı, Shıvelých, Klıýchevskoı jáne Karymskıı syndy belsendi janartaýlarǵa barmaýǵa keńes bergen bolatyn. Sebebi olardyń seısmıkalyq belsendiligi joǵarylap ketken.

Klıýchevskaıa Sopka nemese Klıýchevskoı — Kamchatka túbeginiń shyǵysynda ornalasqan belsendi janartaý jáne Eýrazııadaǵy eń bıik atqylaýshy janartaý. Onyń bıiktigi teńiz deńgeıinen shamamen 4700 metrden asady.

Buǵan deıin Kamchatkada 1952 jyldan bergi eń kúshti jer silkinisi tirkeldi. Túrli derekterge sáıkes, zilzalanyń magnıtýdasy 8,7-ge jetken.

AQSh Geologııalyq qyzmetiniń málimetinshe, bul Kamchatkadaǵy zilzala 2011 jyldan beri tirkelgen eń qýatty tabıǵı apat bolyp otyr jáne 1900 jyldan bergi álemdegi 10 eń iri jer silkinisiniń qataryna kirgen.

Kamchatkadaǵy jer silkinisinen keıin birneshe elde tsýnamı týraly eskertý jarııalandy.

Budan bólek sársenbi kúni Japonııa Reseıdegi Kamchatkada bolǵan kúshti jer silkinisinen keıin eldiń Tynyq muhıty jaǵalaýynda tsýnamı qaýpi týraly jarııa etti. Elde bıiktigi 50 sm deıin tsýnamı tirkeldi.