Kamchatkadaǵy jer silkinisinen keıin Chılıde tsýnamı qaýpi jarııalandy

BÝENOS-AIRES. KAZINFORM —  Kamchatkada bolǵan kúshti jer silkinisinen keıin Chılı Áskerı-teńiz flotynyń Gıdrografııa jáne okeanografııa qyzmeti eldiń jaǵalaýynda tsýnamı qaýpi bar ekenin eskertti. Bul týraly Ońtústik Amerıka eliniń Tótenshe jaǵdaılarmen kúres jónindegi ulttyq qyzmetiniń dırektory Alısııa Sebrıan málimdedi, dep jazdy TASS.

— Chılıdiń búkil jaǵalaýyna, sonyń ishinde Chılı Antarktıkasyna da tsýnamı qaýpi jarııalanady, — dedi ol baspasóz máslıhatynda.

Chılılik mamandardyń málimetinshe, tsýnamı sársenbi kúni jergilikti ýaqytpen saǵat 14:51–de (Máskeý ýaqytymen 21:51) el jaǵalaýlaryna jetýi múmkin.

— Biz tabıǵı apattar kezinde qaýip-qaterlerdi basqarý jónindegi komıtetterdi shuǵyl túrde shaqyramyz. Bul jaǵdaıdy baqylaýǵa jáne evakýatsııa protsesi týraly azamattardy aqparattandyrýǵa múmkindik beredi. Ýaqyt bar, tolqyn birden jetpeıdi, — dedi Sebrıan.

Sársenbi kúni tańerteń Kamchatkada magnıtýdasy 8,7 bolatyn jer silkinisi tirkeldi. Óńirlik densaýlyq saqtaý basqarmasynyń habarlaýynsha, jaraqat alǵandar bar, jedel járdem shaqyrýlar sany artqan. Jergilikti bılik organdary qyzmetterdiń jumysyn úılestirý úshin óńirlik shtab qurdy.

30 sm bıiktiktegi tsýnamı tolqyny Japonııa jaǵalaýlaryna jetti. Sahalın oblysynda Soltústik-Kýrılsk porty men balyq ónerkásibi kásiporny sý astynda qaldy.