Kamchatkadaǵy Klıýchevskaıa sopka janartaýy 6 shaqyrym bıiktikke atqylady
ASTANA. KAZINFORM – Kamchatkadaǵy Klıýchevskaıa sopka janartaýy teńiz deńgeıinen 6 shaqyrym bıiktikke deıin kúl shashty. Kúl bulty janartaýdan shyǵysqa qaraı 130 shaqyrymǵa sozyldy, dep habarlaıdy TASS agenttigi.
Bul týraly Kamchatkadaǵy janartaý atqylaýyn baqylaý toby habarlady.
– Beınebaqylaý derekteri boıynsha, kúl teńiz deńgeıinen 6 shaqyrym bıiktikke deıin kóterildi. Spýtnıktik málimetter janartaýdan shyǵysqa qaraı sozylǵan kúl bultynyń uzyndyǵy 130 shaqyrymǵa jetkenin kórsetti, – dedi ǵalymdar.
Janartaýdyń belsendiligi tómen bıiktikte ushatyn áýe kemelerine qaýip tóndirýi múmkin.
Klıýchevskaıa sopka – Eýrazııadaǵy eń bıik belsendi janartaý. Onyń tóbesindegi kraterdiń dıametri shamamen 700 metr. Betkeılerinde 80-ge jýyq janama jarylys krateri men shlak konýstary ornalasqan.
Janartaý 15 tamyzda atqylaı bastady.
Buǵan deıin Kamchatkadaǵy Klıýchevskaıa sopka janartaýy 6 shaqyrym bıiktikke kúl shashyp, kúl bulty eldi mekender joq Ozernyı shyǵanaǵyna qaraı taralǵany habarlanǵan.
Sondaı-aq Etna janartaýy atqylap, Sıtsılııadaǵy áýe qatynasyna kedergi keltirdi.
Al Neapol mańyndaǵy janartaýlyq aımaqta sońǵy jyldardaǵy eń kúshti jer silkinisi boldy.
