Kamchatkada jer silkinisinen keıin janartaý oıandy

ASTANA. KAZINFORM — Kamchatkadaǵy Klıýchevskıı janartaýy oıanyp, odan 7,2 shaqyrym bıikke kúl-tozań ushty, dep habarlaıdy TASS. 

Aqparatty Reseı ǵylym akademııasy Janartaý jáne topyraqtaný ınstıtýtynyń Kamchatka janartaýynyń atqylaýyna qarsy áreket etý toby habarlady.

— Výlkandyq bult 7,2 shaqyrym bıiktikke deıin jetti. Kúl shoǵyry janartaýdan 57 shaqyrymǵa sozyldy, — deıdi ǵalymdar.

Olar Klıýchevskııge qyzǵylt-sary avıatsııalyq qaýiptilik kody berilgenin aıtty. Qazir aýmaqta belgili bir mólsherde janartaý kúli bar bý jáne gaz belsendiligi júrip jatyr. Bul tómen ushatyn ushaqtarǵa áser etýi múmkin. Sondaı-aq kúldiń ushý bıiktigi 10 shaqyrymǵa deıin jetý qaýpi bar.

Klıýchevskıı janartaýy — Eýrazııadaǵy eń belsendi janartaý. Bul dıametri shamamen 700 metr bolatyn shyń krateri (shuńqyr - red.) bar konýs. Janartaýdyń baýraıynda 80-ge jýyq qaıtalama jarylys shuńqyrlary men shlak konýstary bar.

Aıta keteıik, keshe Kamchatkada 24 saǵat ishinde 7 jer silkinisi tirkeldi.