Kamchatkada termaldy anomalııa tirkeldi

ASTANA. KAZINFORM – Kamchatka ǵalymdary jylý anomalııasy baıqalǵan Mýtnovskaıa sopka janartaýynda belsendilikti tirkedi, dep habarlaıdy TASS aqparat agenttigi. 

Reseı ǵylym akademııasynyń (RǴA) Geofızıkalyq qyzmetiniń Kamchatka fılıalynyń habarlaýynsha, janartaýǵa qaýiptiliktiń sary kody berilgen.

– Kúshti jer silkinisteriniń oshaqtyq aımaqtarynan dúmpýlerdiń úzdiksiz aǵynyna baılanysty janartaýdy seısmıkalyq baqylaý jáne onyń atqylaýyn boljaý múmkin emes, - dep baıandady mekeme. 

Olar túbekte janartaýlardyń seısmogendik jandanýyn eskere otyryp, Mýtnovskaıa sopkaǵa «barý usynylmaıdy» dep atap ótti.

Sondaı-aq 4 tamyzda kúndiz Kamchatkadaǵy Krashenınnıkov janartaýynda 4 km bıiktikke deıingi termııalyq shyǵaryndy tirkeldi. Reseı TJM aımaq boıynsha Bas basqarmasynyń habarlaýynsha, bul áýe qatynasy úshin qaýipti bolýy múmkin. 

Bul – sońǵy 24 saǵatta janartaýdan kúl shyǵýdyń ekinshi oqıǵasy. 

Budan basqa, Kamchatkadaǵy Klıýchevskaıa sopka janartaýynan 6,5 shaqyrym bıiktikke kúl shyqqany tirkeldi. 

Kamchatkadaǵy Klıýchevskıı janartaýy baýraıynan túsetin lava aǵynynyń uzyndyǵy 3 shaqyrymǵa jetip, qazirdiń ózinde belsendi erip jatqan Bogdanovıch muzdyǵyna jaqyndap keledi. Mamandar eskertkendeı, bul protsester Tolbachık janartaýyndaǵy týrıster úshin qaýipti bolýy múmkin.

Klıýchevskaıa sopka janartaýy – Eýrazııadaǵy eń belsendi janartaý. Janartaý 4,5 myńǵa jýyq adam turatyn Ýst-Kamchatskıı aýdanyndaǵy Klıýchı aýylynan 30 shaqyrym jerde ornalasqan. 

Janartaýlardyń belsendiligi jaqynda Kamchatka jaǵalaýynda bolǵan 8,8 baldyq jer silkinisimen baılanysty bolýy múmkin. Ǵalymdardyń baǵalaýynsha, bul 1952 jyldan beri osy aımaqtaǵy eń kúshti jer silkinisi boldy.

Buǵan deıin Kamchatkadaǵy jer silkinisinen keıin janartaýlar atqylaı bastaǵanyn jazǵan bolatynbyz.