Kamchatkada taǵy da jer silkindi — AQSh tsýnamı qaýpin jarııalady

ASTANA. KAZINFORM — Kamchatkanyń shyǵys jaǵalaýynda 7,7 magnıtýdaly jer silkinisi tirkeldi, dep jazdy TASS agenttigi.

Bul týraly Eýropa-Jerorta teńizi seısmologııalyq ortalyǵy málimdedi. Olardyń dereginshe, zilzalanyń epıtsentri Petropavl-Kamchatskıı qalasynan 125 shaqyrym soltústik-shyǵysqa qaraı ornalasqan. Jerasty dúmpýleri 40 km tereńdikte bolǵan.

Kamchatka ólkesiniń gýbernatory Vladımır Solodov jer silkinisine baılanysty tsýnamı qaýpi baryn jarııalady.

Keıinirek AQSh Geologııalyq qyzmeti de Kamchatkadaǵy jer silkinisine baılanysty óz aýmaǵynda tsýnamı qaýpi týraly eskertý jasady.

Buǵan deıin, 13 qyrkúıekte, Petropavl-Kamchatskııden 123 km qashyqtyqta taǵy bir jer silkinisi bolǵan. Onyń magnıtýdasy 6,3, tereńdigi 46,8 km boldy.

Sonymen qatar, 30 shildede Kamchatka jaǵalaýynda óte kúshti jer silkinisi tirkelgen bolatyn. Bul sońǵy onjyldyqtaǵy eń joıqyn zilzala boldy — jer silkinisiniń magnıtýdasy 8,8-ge jetti. Bul jaǵdaıǵa baılanysty Kamchatkada joǵary daıyndyq rejımi engizildi. Sol dúmpýler Soltústik Kýrılsk turǵyndaryna da sezilgen.

Bul jer silkinisi Tynyq muhıtynda tsýnamıdiń paıda bolýyna sebep boldy. Sol kezde Japonııa, AQSh jáne Fılıppın bıligi de tsýnamı qaýpi týraly eskertý jasaǵan edi.