Kamchatkada taǵy da jer silkindi

ASTANA. KAZINFORM — Kamchatkada 5,5 magnıtýdaly jer silkinisi boldy, dep habarlaıdy TASS.

Kamchatkada magnıtýdasy 5,5 bolatyn jer silkinisi tirkeldi. Bul týraly Reseı ǵylym akademııasynyń Birikken geofızıkalyq qyzmetiniń Kamchatka fılıaly habarlady.

Seısmologterdiń málimetinshe, jer silkinisiniń oshaǵy 65,3 shaqyrym tereńdikte ornalasqan.

Jerasty dúmpýleri Petropavlovsk-Kamchatskıı qalasynan 275 km qashyqtyqta bolǵan.

Ázirge jer silkinisiniń sezilgendigi týraly málimet joq.

Eske salsaq, shildeniń aıaǵynda Kamchatka tarıhynda eń kúshti jer silkinisi tirkeldi. Onyń magnıtýdasy 8,7-ge jetti.

Kamchatkadaǵy jer silkinisinen keıin Chılıde tsýnamı qaýpi jarııalanǵany belgili boldy.

Bul azdaı óńirdegi jer silkinisinen keıin Klıýchevskaıa Sopka janartaýy atqylaı bastady.

Keıinnen Kamchatka jaǵalaýynda bir saǵat ishinde segiz jer silkinisi tirkelgeni anyqtaldy.

30 shildede bolǵan kúshti jer silkinisinen keıin Kamchatka túbeginiń ońtústik bóligi ońtústik-shyǵysqa qaraı 2 metrge jýyq jyljyp ketti.