Kamchatkada sońǵy bir táýlikte 120-ǵa jýyq aftershok tirkeldi

ASTANA.  KAZINFORM —  30 shildede bolǵan joıqyn jer silkinisinen keıingi bir táýlikte Kamchatkada magnıtýdasy 3,5-ten 6,7-ge deıin jetetin shamamen 120 aftershok tirkeldi, dep habarlaıdy TASS.

Reseıdiń Kamchatka ólkesi boıynsha Tótenshe jaǵdaılar jónindegi bas basqarmasynyń málimetinshe, jergilikti eldi mekenderde keıbir dúmpýler 5 ballǵa deıin sezilgen.

— Sońǵy táýlikte 120 aftershok tirkeldi. Olardyń magnıtýdasy 3,5 pen 6,7 aralyǵynda. Eldi mekenderde keıbiri 2-den 5 ballǵa deıingi kúshpen sezildi, — delingen vedomstvo habarlamasynda.

Seısmologtardyń aıtýynsha, óńirdegi seısmıkalyq belsendilik birtindep tómendep keledi, alaıda ázirge joǵary deńgeıde qalyp otyr. Mamandardyń boljamynsha, 30 shildedegi magnıtýdasy 8,8 jer silkinisinen keıingi aftershoktar birneshe aıǵa deıin jalǵasýy múmkin.

Qazirgi tańda Petropavlovsk-Kamchatskıı qalasy men Elızovo aýdanynda ýaqytsha ornalasý úshin eki qabyldaý pýnkti ashylǵan. 1 tamyz tańerteńgi málimet boıynsha, onda 190 adam ýaqytsha turyp jatyr. Atalǵan azamattarmen Reseı TJM-nyń psıhologtary jumys júrgizip jatyr.

Eske sala keteıik, 30 shilde kúni Kamchatka jaǵalaýynda qýatty jer silkinisi boldy. Bul — 1952 jyldan bergi eń kúshti silkinis retinde tirkelip otyr. Bılik ókilderiniń málimetinshe, onyń magnıtýdasy 8,8-ge jetken.

Atalǵan zilzala Tynyq muhıtynda tsýnamıdiń paıda bolýyna sebep boldy. Tsýnamı qaýpine baılanysty Japonııa, AQSh jáne Fılıppın bıligi dabyl qaqqan bolatyn.