Kamchatkada Bezymıannyı janartaýynyń seısmıkalyq belsendiligi artyp barady

ASTANA. KAZINFORM — Kamchatkadaǵy Bezymıannyı janartaýynda sońǵy táýlikte shamamen 40 seısmıkalyq jaǵdaı tirkeldi, onyń seısmobelsendiliginiń artyp bara jatqany týraly TASS-qa Reseı ǴA Geofızıkalyq qyzmetiniń Kamchatka fılıaly habarlady.

«Bezymıannyı janartaýynda táýligine shamamen 40 seısmıkalyq oqıǵa tirkeldi, janartaýdyń seısmobelsendiligi ósip jatyr. Qazirgi ýaqytta seısmıkalyq belsendilik qalypty jaǵdaıdan joǵary», dep málimdedi mekeme ókilderi.

Reseı ǴA Qıyrshyǵystyq bólimshesi Janartaýtaný jáne seısmologııa ınstıtýtynyń habarlaýynsha, janartaýdyń sońǵy qarqyndy atqylaýy ótken jyldyń jazynda bolǵan, sondaǵy kókke ushqan kúl baǵanasy 12 shaqyrym bıiktikke kóterilgen. Qazirgi ýaqytta janartaýdyń ushar basyndaǵy jarqyly, jer jynystarynyń tómen túsýi tirkelip jatyr, áýe qaýpi kody — qyzǵylt-sary.

Ǵalymdar týrısterge janartaýǵa jaqyndamaýǵa keńes berip otyr. Osy zamandaǵy eń iri atqylaý Bezymıannyı janartaýynda 1956 jyly tirkelgen eken.

Bezymıannyı janartaýy Klıýchevskıı janartaýlyq tobynyń ortalyq bóliginde ornalasqan, ol Klıýchı eldi mekeninen 40 shaqyrym, Petropavlovsk-Kamchatskııden 350 shaqyrym qashyqtyqta jatyr. Bul janartaý jylyna orta eseppen 1-2 ret atqylaıdy.

Eske sala keteıik, buǵan deıin Kamchatkada jer silkinisinen keıin Klıýchevskıı janartaýy oıanǵanyn jazdyq. 

Al Indonezııada iri janartaý atqylaýynan keıin dabyldyń eń joǵary deńgeıi jarııalandy.