Kamchatkada 7,2 jáne 6,8 magnıtýdaly jer silkinisi boldy

ASTANA. KAZINFORM — 2025 jylǵy 20 shildede Kamchatka túbeginde 6,8 magnıtýdaly jer silkinisi tirkeldi, dep habarlaıdy Sınhýa agenttigi TASS-qa silteme jasap. 

Reseı ǵylym akademııasynyń Birikken geofızıkalyq qyzmetiniń Kamchatkadaǵy fılıalynyń málimetinshe, zilzala Petropavl-Kamchatskıı qalasynan 167 shaqyrym qashyqtyqta bolǵan. Bul osy aımaqtaǵy qatarynan tórtinshi jer silkinisi.

Buǵan deıin Sınhýa aqparat agenttigi jeksenbi kúni Beıjiń ýaqytymen 14:49-da Kamchatka túbeginiń shyǵys jaǵalaýyndaǵy teńiz akvatorııasynda 7,2 magnıtýdaly jer silkinisi bolǵanyn málimdedi. Bul týraly Qytaıdyń seısmologııalyq jeliler ortalyǵy (CENC) habarlady.

CENC málimetinshe, jer silkinisiniń epıtsentri 52,90° soltústik endik pen 160,45° shyǵys boılyq núktesinde ornalasqan. Zilzalanyń tereńdigi 10 shaqyrym bolǵan.

Seısmologter qazirgi ýaqytta zilzalanyń naqty parametrlerin anyqtap jatyr.

Qalada dabyl sırenalary qosylyp, tsýnamı qaýpi týraly eskertý jarııalanǵan.

Reseı TJM-niń Kamchatka ólkesi boıynsha bas basqarmasynyń málimetinshe, yqtımal tsýnamıdiń eń joǵary tolqyny 60 santımetrden aspaıdy.

Buǵan deıin 17 shildede qazaqstandyq seısmologter Aýǵanstan aýmaǵynda jer silkinisin tirkegen bolatyn.