Kamchatkada 10 mınýt ishinde úsh ret jer silkindi
ASTANA. KAZINFORM – Jeksenbi kúni keshke Kamchatka túbeginiń jaǵalaýynda seısmologtar 10 mınýt ishinde úsh jer silkinisin tirkedi. Olardyń eń kúshtisiniń magnıtýdasy 6,4-ke jetti, dep habarlaıdy Sınhýa agenttigi.
Jer silkinisteriniń epıtsentrleri Petropavl-Kamchatskıı qalasynan 366-381 shaqyrym qashyqtyqta ornalasqan. Bul týraly Reseı ǵylym akademııasynyń Biryńǵaı geofızıkalyq qyzmetiniń Kamchatka fılıaly habarlady.
Málimetke sáıkes, magnıtýdasy 6,4 bolatyn alǵashqy jer silkinisi jergilikti ýaqytpen saǵat 22:41-de bolǵan. Onyń epıtsentri Petropavl-Kamchatskııden 381 shaqyrym jerde ornalasqan, al gıpotsentriniń tereńdigi 37,3 shaqyrymdy quraǵan.
Bes mınýttan keıin, saǵat 22:46-da seısmologtar magnıtýdasy 5,6 bolatyn ekinshi jer silkinisin tirkedi. Onyń epıtsentri Petropavl-Kamchatskııden 366 shaqyrym jerde, al gıpotsentriniń tereńdigi 37,5 shaqyrym bolǵan.
Taǵy bes mınýttan soń, saǵat 22:51-de magnıtýdasy 5,3 bolatyn úshinshi jer silkinisi tirkeldi. Bul joly epıtsentr qaladan 367 shaqyrym qashyqtyqta ornalasqan, gıpotsentriniń tereńdigi 21 shaqyrymdy qurady.
Reseılik BAQ málimetinshe, óńirdegi eldi mekenderde jer asty dúmpýleriniń sezilý-sezilmeýi týraly aqparat naqtylanyp jatyr.
Qazirgi ýaqytta qıraýlar men zardap shekkender týraly jedel aqparat túsken joq.
Aıta keteıik, keshe Grekııanyń Evbeıa aralynda magnıtýdasy 4,9 bolatyn jer silkinisi tirkeldi.
