Kambodjanyń jynys ormandary kóne ımperııa mekenin jasyryp kelgen
ASTANA. QazAqparat - Kambodjadaǵy Angkor-Vat kóne ǵıbadathana kesheni álemdegi eń iri nysan ekendigi belgili boldy. Onyń aýmaǵy 200 sharshy shaqyrym. Alaıda qazir bul arheologııalyq eskertkishtiń mańyzy áldeqaıda joǵary: onyń aınalasynda megapolıs bolǵany anyqtaldy. Kóne mekenniń úıleri, joldary jáne arnalary djýnglıdiń astynda qalǵan, dep jazady National Geographic jýrnaly.
Sıdneı ýnıversıtetiniń arheologtary LiDAR tehnologııasyn paıdalanyp, sensatsııalyq jańalyq ashty. Tikushaqtan lazerlik sáýleler jerge jiberilip, arnaıy optıkalyq júıemen óńdeledi. Nátıjesinde jer astyndaǵy nysandardyń naqty kartasyn qurastyrýǵa bolady. Bastapqyda bul tehnologııa áskerı qajettilikter úshin jasalǵan. Ol qarsylastyń sý astyndaǵy súńgýir qaıyqtaryn anyqtaýǵa kómektesti.
Ǵalymdar Angkor aınalasyndaǵy djýnglı 900-1400 jyldyq birneshe qalany jasyryp turǵanyn anyqtady. Olar bir-birimen joldar, sý arnalary arqyly baılanysqan. Keıbireýleri aýdany Kambodja astanasy Pnompennen de úlken.
Bul jańalyq uly khmer ımperııasy týraly derekterdi tolyǵymen ózgertedi.
