Kambodja Trampty resmı túrde Nobel syılyǵyna usyndy

ASTANA. KAZINFORM – Kambodja AQSh prezıdenti Donald Trampty Taıland elimen shekarada beıbitshilikti qalpyna keltirgeni úshin resmı túrde Nobel syılyǵyna usyndy, dep habarlaıdy Kambodja baspa agenttigi.

El premer-mınıstri Hýn Manet joldaǵan hatta Tramptyń kandıdatýrasy onyń búkil álemde beıbitshilikti nyǵaıtýǵa qosqan úlesi úshin usynylyp otyrǵany aıtylǵan.

- Ol der kezinde iske aralasyp, úlken qaqtyǵystyń aldyn aldy. Óıtpegende qanshama adam qurban bolýy múmkin edi. Ol eki arasynda beıbitshiliktiń ornyǵýyna jol saldy,-dedi ol.

Kambodjanyń bul nıeti týraly ótken aptada-aq belgili bolǵan edi.

1 tamyzda Kambodja premer-mınıstriniń orynbasary Sýn Chantol Trampqa beıbitshilikti ornatýǵa qosqan úlesi úshin alǵys bildirip, bul árekettiń halyqtar arasyndaǵy dostyqqa qosqan úlesi úshin jeke tulǵa men uıymǵa beriletin tanymal halyqaralyq syılyqqa laıyqty ekenin atap ótti.

Osyǵan deıin Kýala-Lýmpýrde ótken kelissózder barysynda Taıland pen Kambodja eki el arasyndaǵy shekaradaǵy jaǵdaıdy retteý týraly kelisimge kelgeni týraly jazdyq.

Ertesine tań ata Taıland pen Kambodjanyń shyǵys shekarasynda qaqtyǵystar bastaldy. Eki tarap ta bir-birin atysty bastady dep aıyptady.

Taıland pen Kambodja arasyndaǵy uzaq jyldyq qaqtyǵys nelikten qaıtalanýy múmkin ekeni týraly myna siltemeden oqysańyzdar bolady.