Kambodja Premer-mınıstri Qazaqstanǵa resmı saparmen keldi
ASTANA. KAZINFORM — Aqordada Memleket basshysy Qasym-Jomart Toqaev Kambodja Koroldiginiń Premer-mınıstri Hýn Manetti qarsy aldy.
Joǵary mártebeli meımannyń kelýine oraı saltanatty rásimder zalynda qurmet qaraýyly sap túzedi.
Qasym-Jomart Toqaev pen Hýn Manet resmı delegatsııa múshelerin bir-birine tanystyrdy. Qazaqstan delegatsııasy quramynda QR Syrtqy ister mınıstri Muhtar Tileýberdi, Astana ákimi Jeńis Qasymbek bar.
Odan keıin Qurmet qaraýyly rotasynyń komandıri saltanatty raport berdi. Prezıdent orkestri Qazaqstan men Kambodjanyń memlekettik ánurandaryn oryndady.
Saltanatty rásimnen soń Qazaqstan Prezıdenti men Kambodja Premer-mınıstri kilem tóselgen jolmen Qazaqstannyń Memlekettik týyna qaraı júrip ótti. Budan keıin taraptar kelissózder júrgizýge kiristi.
Aıta keteıik, 2026 jylǵy qańtar-tamyz aılarynda Qazaqstan men Kambodja arasyndaǵy taýar aınalymy 29,4 mln dollar boldy. Bul ótken jylǵy osy kezeńimen salystyrǵanda 3,2%-ǵa kóp.
Qazaqstanǵa Kambodjadan kóbine toqyma jáne trıkotaj buıymdary, aıaq kıim men keıbir tutyný taýarlary jetkiziledi. Al Qazaqstan Kambodjaǵa negizinen baqylaý-ólsheý quraldaryn eksporttaıdy.
Eske sala ketsek, bıyl shilde aıynda Shanhaıda ótken Dúnıejúzilik jasandy ıntellekt jónindegi konferentsııa aıasynda Memleket basshysy Kambodja Premer-mınıstri Hýn Manetpen kezdesken edi. Hýn Manet Kambodjanyń Qazaqstanmen qarym-qatynasty nyǵaıtýǵa múddeli ekenin rastady.
