Kambodja men Taıland shekara máselesin kelesi aptada Malaızııada talqylaıdy

ASTANA. KAZINFORM — Kambodja Taılandtyń kelesi aptada Malaızııada shekara máselesine qatysty kelissózder ótkizý jónindegi usynysyn quptady, dep habarlaıdy Sınhýa. 

Bul týraly juma kúni Kambodja Qorǵanys mınıstrliginiń resmı ókili, memlekettik hatshynyń orynbasary Malı Sochheat málimdedi.

— Osy múmkindikti paıdalanyp, Taılandtyń Kýala-Lýmpýrda Bas shekara komıtetiniń otyrysyn ótkizý jónindegi usynysyn Kambodja quptaıtynyn rastaǵym keledi, — dedi ol. 

Sochheat aldaǵy kezdesý konstrýktıvti ótip, nátıjeli bolatynyna senim bildirdi.

Onyń aıtýynsha, otyrysqa Kambodja qorǵanys mınıstri Tıa Seıha men Taıland qorǵanys mınıstriniń orynbasary Nattaphon Nakphanıt qatysady.

Buǵan deıin, beısenbi kúni Taıland Qorǵanys mınıstrliginiń baspasóz qyzmeti áleýmettik jelide Nattaphon Nakphanıttiń Kambodjanyń arnaıy Bas shekara komıtetiniń otyrysyn ótkizý týraly usynysyna resmı túrde jaýap bergenin habarlady. Ol kezdesýge qatysý múmkindigin quptap, shekaradaǵy shıelenisti beıbit jáne konstrýktıvti jolmen retteýge beıildi ekenin atap ótti.

Eske sala keteıik, 24 shildede Kambodja men Taıland áskerıleri daýly shekara aýmaǵynda qarýly qaqtyǵysqa túsken edi. 28 shildede taraptar oq atýdy toqtatý týraly kelisimge kelip, ol sol kúni túngi saǵat 00:00–de kúshine endi.