Kambodja men Taıland arasyndaǵy shekaralyq qaqtyǵystarda 96 adam qaza tapty

ASTANA. KAZINFORM — Kambodja men Taıland arasyndaǵy shekaralyq qaqtyǵystarda qaza tapqandardyń jalpy sany 96 adamǵa jetti, dep habarlady resmı derekkózder. Bul týraly Anadolý agenttigi jazdy.

Kambodjanyń memlekettik aqparat agenttigi Agence Kampuchea Presse (AKP) eldiń Qorǵanys mınıstrligine silteme jasap, sársenbi kúni tańerteń Taıland armııasy Banteaımeancheı provıntsııasyndaǵy aýylǵa artıllerııalyq soqqy jasady dep habarlady. Shabýyl saldarynan bir beıbit turǵyn qaza tapqan.

Sonymen qatar Kambodja Іshki ister mınıstrligi 7 jeltoqsannan beri qaqtyǵystardan qaza tapqandar sany 31 adamǵa jetkenin, al ishki aımaqtan kóship ketken azamattar sany 610 myń adamǵa jetkenin málimdedi.

«Nation Thailand» gazeti Taıland armııasyna silteme jasap habarlaǵandaı, Kambodja tarapynan Sa-Keý provıntsııasyndaǵy birneshe aýylǵa shamamen 40 reaktıvti BM-21 snarıady atylǵan. Shabýyl saldarynan azamattyq ınfraqurylym zaqymdanyp, úsh turǵyn úı qıraǵan.

Taıland bıligi qaqtyǵystar barysynda 42 beıbit turǵyn men 23 áskerı qyzmetker qaza tapqanyn, shamamen 400 myń adam óz úılerin tastap ketýge májbúr bolǵanyn aıtty.

Buǵan deıin Taıland pen Kambodja ortaq 817 km shekaranyń ońtústik bóliginde ornalasqan shekaralyq pýnktterdiń birinde áskerı kelissózder bastaǵan. Jıyn úsh kúnge sozylyp, kelissózder arqyly kelisimge qol jetkizýge múmkindik týǵyzýy múmkin dep habarlandy.

Eske sala ketsek, Taıland pen Kambodja 24 jeltoqsanda bitimge qatysty kelissóz ótkizetinin habarladyq.