Qambarata-1 SES-niń qurylys shyǵyndaryn úsh el teń bólip kóteredi
ASTANA. QazAqparat – «Qambarata-1» SES-niń qurylys shyǵyndaryn Qazaqstan, Ózbekstan, Qyrǵyz taraptary teń bólip kóteredi, dep habarlaıdy QazAqparat tilshisi.
Bul týraly Energetıka mınıstrliginiń QazAqparat saýalyna joldaǵan jaýabynda aıtylǵan.
«Bıylǵy 6 qańtarda Qazaqstan Respýblıkasynyń, Qyrǵyz Respýblıkasynyń jáne Ózbekstan Respýblıkasynyń energetıkalyq vedomstvolary jobany tepe-teń negizde iske asyrý jónindegi jol kartasyna qol qoıdy.
Qazirgi ýaqytta taraptar úkimetaralyq kelisimge qol qoıý máselesin pysyqtaýda. Jobany iske asyrýdyń negizgi sharttary sonyń sheńberinde aıqyndalady. Bul rette jarııa talqylaý jáne kelisý bóliginde halyqaralyq sharttar týraly zańnamanyń talaptary saqtalady», - delingen jaýapta.
Vedomstvonyń málimeti boıynsha, jobanyń naqty quny ázirge belgisiz.
«Jobanyń negizgi tehnıkalyq sheshimderi men qunyn aıqyndaý maqsatynda taraptar tehnıkalyq-ekonomıkalyq negizdeme ázirleıdi. Taraptardyń úlesi jobaǵa qatysý úlesine sáıkes aıqyndalatyn bolady», - dep jazady mınıstrlik mamandary.
Foto:twitter.com/trtavazkirgizca