«Qambar ata» GES-i Ortalyq Azııanyń energetıkalyq áleýetin nyǵaıta túsedi
TAShKENT. KAZINFORM – Úsh eldiń Energetıka mınıstrleri Tashkentte bas qosyp, «Qambar ata - 1» jobasyn iske asyrý múmkindigin talqylady, dep habarlaıdy Kazinform agenttiginiń menshikti tilshisi.
Kezdesýge Ózbekstan men Qyrǵyzstannan energetıka vedomstvolarynyń basshylary, al Qazaqstan atynan vıtse-mınıstr Suńǵat Esimhanov qatysty. Sonymen qatar, talqylaýda Dúnıejúzilik bank ókilderi de «Qambar ata - 1» gıdroelektrostantsııasy jobasyn júzege asyrýǵa qatysty oı-pikirlerin qosty.
Uıymdastyrýshy tarap retinde jıynda alǵash bolyp sóz alǵan Ózbekstannyń Energetıka mınıstri Jýrabek Mırzamahmýdov GES-ti salý barlyq Ortalyq Azııa elderi úshin strategııalyq mańyzǵa ıe ekenin atap ótti. Bul rette resmı Tashkent jobaǵa jan-jaqty qoldaý kórsetýge daıyn.
- «Qambar ata - 1» GES-i óńirdiń energetıkalyq áleýetin odan ári bekemdeı túsýge yqpal etedi. Sondaı-aq, «jasyl» ekonomıkaǵa oıysýǵa nıetti memleketterimizdiń josparyn júıeli iske asyrýǵa múmkindik ashady, - dedi Jýrabek Mırzamahmýdov.
QR Energetıka vıtse-mınıstri Suńǵat Esimhanov ta atalǵan jobanyń mańyzdylyǵyna toqtaldy. Onyń paıymynsha, «Qambar ata - 1» GES-in salý júıeli uıymdastyrylǵan is-qımyldy talap etedi.
- Elderimiz arasyndaǵy seriktestik «Qambar ata - 1» gıdroelektrostantsııasy jobasyn tabysty iske asyrýǵa múmkindik berdi jáne óńirdegi uzaq merzimdi turaqtylyqty qamtamasyz etedi. Sonyń negizinde memleketterde áleýmettik-ekonomıkalyq ilgerileý qarqyn alady, - dedi Suńǵat Esimhanov.
Úsh el gıdroelektrostantsııasynyń qurylysyn qarjylandyrý úshin Dúnıejúzilik bankke usynys joldaǵan. Tıisinshe, qazirgi tańda atalǵan uıym mamandarynyń qatysýymen jobanyń tehnıkalyq-ekonomıkalyq negizdemesi ázirlenip jatyr.
- Dúnıejúzilik bank Qazaqstan, Ózbekstan jáne Qyrǵyzstan úkimetteriniń josparyn qoldaıdy. Biz «Qambar ata» stantsııasynyń qurylysyn júzege asyrý úshin tehnıkalyq kómek kórsetemiz. Sonymen qatar, ózge de halyqaralyq seriktestermen birlesip, jobaǵa qarjat tartý mindeti tur. Bul baǵytta tıisti jumystardy qolǵa aldyq, - dedi Dúnıejúzilik banktiń Ortalyq Azııadaǵy óńirlik dırektory Tatıana Proskýrıakova.
Kezdesý qorytyndysy boıynsha taraptar birlesken jumystardy jalǵastyrýǵa jáne osyndaı formattaǵy basqosýlardy turaqty negizde ótkizip turýǵa ýaǵdalasty.
Eske salaıyq, buǵan deıin Tashkent pen Kabýl transaýǵan temirjolynyń qurylysyn jedeldetýge nıetti ekenin jazyp edik.
Sonymen qatar, keshe Ózbekstan men Qyrǵyzstan prezıdentteri beıresmı kezdesý ótkizip, birlesken jobalardy ilgeriletýge kelisti.
Qosa ketsek, Eýroodaq pen Ortalyq Azııa elderiniń sammıti bıyl sáýirde Samarqanda ótedi.