Qambar-Ata GES-1: úshjaqty kelissóz bastaldy
ASTANA. KAZINFORM — Bishkekte Qazaqstan Respýblıkasy, Qyrǵyz Respýblıkasy jáne Ózbekstan Respýblıkasy delegatsııalary arasynda kelissózderdiń alǵashqy kezeńi ótti. Taraptar Qambar-Ata-1 gıdroelektr stantsııasyn (GES-1) salý jobasyn iske asyrý týraly Úkimetaralyq kelisim jobasyn talqylady. Bul týraly Energetıka mınıstrligi málim etti.
Qambar-Ata-1 GES jobasy energetıka salasyndaǵy strategııalyq mańyzy bar óńirlik bastama bolyp tabylady. Ol Ortalyq Azııa memleketteriniń energetıkalyq qaýipsizdigin nyǵaıtýǵa baǵyttalǵan jáne Qyrǵyz Respýblıkasynyń aýmaǵyndaǵy Naryn ózeninde belgilengen qýaty 1880 MVt bolatyn gıdroelektr stantsııasyn salýdy kózdeıdi.
Kelissózder Qazaqstan Respýblıkasynyń Energetıka vıtse-mınıstri Suńǵat Esimhanovtyń, Qyrǵyz Respýblıkasynyń Energetıka mınıstriniń orynbasary Altynbek Rysbekovtiń jáne Ózbekstan Respýblıkasynyń Energetıka mınıstriniń orynbasary Ýmıd Mamadamınovtyń teń tóraǵalyǵymen ótti.
— Delegatsııalar quramyna úsh eldiń múddeli memlekettik organdary men beıindi uıymdarynyń ókilderi kirdi. Dúnıejúzilik bank ókilderiniń baqylaýshy retinde qatysýy bul uıymnyń jobanyń negizgi halyqaralyq qarjylyq seriktesi retindegi mańyzdy rólin rastaıdy, — delingen habarlamada.
Kelissózder qorytyndysy boıynsha taraptar Úkimetaralyq kelisim jobasynyń erejelerin kelisý boıynsha birlesken jumysty jalǵastyrý nıetin qýattady. Kelissózderdiń kelesi kezeńi 2026 jyldyń sáýir aıynda Tashkent qalasynda ótedi dep josparlanǵan.
Buǵan deıin Eýroodaq Qyrǵyzstanǵa «Qambar-Ata-1 sý elektr stantsııasynyń» qurylysyna 1 mlrd dollar bóletinin jazdyq.