Qambada 2 jarym jylǵa jetetin unnyń astyǵy bar – Erbol Qarashókeev
«Álemde bolyp jatqan jaǵdaıǵa baılanysty un eksportyna tolyq tyıym salmasaq, ózimiz ónimsiz qalamyz dep júrgender bar. Olardyń aıtýynsha, Qazaqstan qoldaǵy unnyń bárin satyp jibergen», - dedi BAQ ókili mınıstrge Májilistiń kýlýarynda.
«Bizde Qazaqstanǵa jarty jylǵa jetetin un bar. Onyń ústine astyq ta bar. Qajet bolsa, unǵa aınaldyra alamyz. Qarapaıym ǵana mysal keltireıin. «Azyq-túlik kroporatsııasynyń» qambasynda 800 myń tonna astyq bar. Ony unǵa aınaldyrsaq, Qazaqstanǵa qajet unnyń 2 jarym jyldyq qoryn alýǵa bolady. Sondyqtan qaıta óńdeýshilerdi sabasyna túsirgim keledi. Eger olar qandaı da bir sebeppen bul bıznespen aınalysqysy kelmese, bul alańǵa kez kelgen sátte «Azyq-túlik korporatsııasy» kele alady. Ózindegi astyqty qaıta óńdep, Qazaqstan naryǵyna un jetkizedi. Biraq bul durys bolmaıdy dep oılaımyn. Óıtkeni, mundaı ispen bıznes aınalysýy kerek»
, - dedi vedomstvo basshysy.
Sondaı-aq, ol mınıstrlik tarapynan astyq eksporttaýshylarǵa qandaı usynys aıtylǵanyn málim etti.
«Qazir bıdaı óndirýshiler baǵanyń óskenin kútip otyrǵanyn túsinemiz. Sondyqtan olar negizgi kólemdi ózderinde ustap otyr. Baǵa ári qaraı óse túsedi dep oılaıdy. Osyǵan baılanysty, teńgerimdi saqtaý úshin 15 maýsymǵa deıin astyqshylar Qazaqstannan 1 mln. tonnaǵa deıin astyq shyǵara alady dep otyrmyz. Biraq, sonyń aıasynda osy kólemniń 10 paıyzyn, ıaǵnı 100 myń tonna astyqty Qazaqstan naryǵyna arzan baǵamen ótkizýleri kerek. Biz osylaı usyndyq. Dál osyndaı usynysty un óndirýshilerge de aıtyp otyrmyz. Olar 15 maýsymǵa deıin 300 myń tonnaǵa deıin ǵana un shyǵarýy kerek. Sol shyǵarǵan ónimniń 10 paıyzy kóleminde ishki naryqqa arzan baǵamen satýy kerek. Bul astyq eksporttaýshylardyń da, un eksporttaýshylardyń da quqyǵyn buzbaıdy»
, - dedi Erbol Qarashókeev.
Aıtýynsha, usynylyp otyrǵan kvota mólsheri jyldaǵy eksport kóleminen az emes.
«Sońǵy 5 jylda naýryz, sáýir, maýsym aılarynda Qazaqstannan 100-120 myń tonna un shyǵarylyp turǵan. Bul biz belgilep otyrǵan 300 myń tonna kvota eksporttaýshylarǵa tolyǵymen jetkilikti degen sóz. Astyq boıynsha da solaı. Orta eseppen aıyna 500 myń tonna astyq shyǵarylyp kelgen», - dedi mınıstr.