«KAMAZ» Qazaqstan aýmaǵynda avtomobıl óndirisin arttyrýǵa nıetti

ASTANA. QazAqparat - Úkimet úıinde QR Premer-Mınıstri Asqar Mamın «KAMAZ» kompanııasynyń bas dırektory Sergeı Kogogınmen kezdesý ótkizdi, dep habarlaıdy QazAqparat primeminister.kz saıtyna silteme jasap.

Kezdesý barysynda Qazaqstan aýmaǵynda avtomobılder men arnaıy tehnıka óndirisi boıynsha kompanııamen yntymaqtastyqty odan ári arttyrý máseleleri talqylandy.

S. Kogogın QR Premer-Mınıstrin Qazaqstan aýmaǵynda «KAMAZ» Injınırıng» birlesken kásipornymen avtomobıl tehnıkasyn óndirý týraly aqparattandyrdy. Óndiriletin ónim kólemin arttyrý, jergiliktendirý deńgeıin joǵarylatý týraly kelisimderge qol jetkizildi.

A. Mamın QR Indýstrııa jáne ınfraqurylymdyq damý mınıstrligine Qazaqstanda «KAMAZ»-dyń jekelegen toraptary men komponentterin shyǵarý úshin ónerkásiptik kooperatsııa máselelerin pysyqtaýdy tapsyrdy.

Óz kezeginde S. Kogogın «KAMAZ» kompanııalar toby qazaqstandyq seriktesterimen birge osy óndiriske ınvestıtsııa salý nıetti ekendigin habarlady.

«KAMAZ» kompanııalar toby - Reseı Federatsııasynyń iri avtomobıl korporatsııasy. Óndiristik qýattylyǵy jylyna 71 myń avtomobıldi quraıdy. Rosteh memlekettik korporatsııasynyń quramyna kiredi.

2005 jyly «KAMAZ» korporatsııasy «KAMAZ-Injınırıng» AAQ kompanııasyn qurdy, onda aktsııalardyń 25% «Qazaqstan ınjınırıng» ulttyq kompanııasy» AQ tıesili. Zaýyttyń jobalyq qýattylyǵy: jylyna 1500 mashına. 209 adam turaqty jumys oryndarymen qamtylǵan.

Osy jyldary zaýyt 114 mlrd-tan astam teńgege 12,5 myńnan astam avtokólik jáne arnaıy tehnıka shyǵardy. Olar búginde Qazaqstan ekonomıkasynyń túrli salalarynda, sondaı-aq kúsh qurylymdarynda, jol qurylysynda, aýyl sharýashylyǵynda jáne t.b. paıdalanylýda.