Qamaýǵa alynǵan Burhan Janseıitov advokat emes – Respýblıkalyq advokattar alqasy
«Qarjy monıtorıngi organdary advokat Burhan Janseıitovti ustaǵany týraly aqparat BAQ-ta taralýyna baılanysty Respýblıkalyq advokattar alqasy bul adamnyń advokat bolyp tabylmaıtynyn habarlaıdy», - delingen málimette.
Bul rette Respýblıkalyq advokattar alqasy B. Janseıitovke qatysty tergeýdi zańdy qatań saqtaı otyryp júrgizýdi surap otyr.
«Advokattar óz jumysynda Ádep kodeksin basshylyqqa alady. Oǵan sáıkes kásibı qyzmette olar kásiptiń bedeline qamqorlyq jasap, moral men zańnyń ústemdigi prıntsıpterin oryndaıdy. Dál osyndaı talaptar joǵary zańgerlik bilimi bar kez kelgen adamǵa qatysty bolýy kerek dep sanaımyz. Bul rette zań keńesshisi Burhan Janseıitovke qatysty tergeýdi zańdylyq qaǵıdatyn qatań saqtaı otyryp jáne jasaǵan áreketine quqyqtyq baǵa bere otyryp tergeý júrgizilýin suraımyz», - dedi Respýblıkalyq advokattar alqasynan.
Sondaı-aq sýdıa, prokýror, tergeýshi, zań konsýltanttary men zańgerlerdiń zańǵa qyzmet etý degen bir ǵana mindeti bar ekeni atap ótilgen.
«Advokattardyń quqyqtaryna nemquraıly qaraýdyń keń taralǵan tájirıbesi, advokattyq qyzmet kepildikterin óreskel jáne júıeli túrde buzý barlyq zań mamandyqtaryna ortaq qundylyqtardy joıady, janjaldarǵa jáne bir-biriniń ustanymyn qabyldamaýǵa ákeledi. Munyń bári ádil jáne zańdy memlekettiń qalyptasýyna kedergi keltiredi», – dep habarlady respýblıkalyq advokattar alqasy.
Eske salaıyq, 15 shilde kúni Qarjy monıtorıngi agenttigi Almatyda zańger Burhan Janseıitovtiń ustalǵany týraly habarlaǵan bolatyn.
Al búgin Almaty qalasy tergeý sotynyń qaýlysymen B.Janseıitov 2 aı merzimge, ıaǵnı 17 qyrkúıekke deıin úıqamaqqa alynatyny málim etildi.
«Kúzetpen ustaý túrindegi bultartpaý sharasyn sanktsııalaýdan bas tartyldy», - dedi Almaty qalalyq sotynan.
