Qamaýǵa alynǵan aqtóbelik depýtat jumysshylardy uryp-soqqan
AQTÓBE. QazAqparat - Aqtóbe oblystyq máslıhat depýtaty Baqytjan Erjanov tutqynǵa alyndy. Ol aýyl sharýashylyǵyn damytýǵa baǵyttalǵan sýbsıdııany zańsyz ıemdendi degen kúdikke ilikti, dep habarlaıdy QazAqparat tilshisi.
Aqtóbe oblystyq máslıhatynyń depýtaty, kásipker Baqytjan Erjanovtyń tutqynǵa alynǵanyn buǵan deıin habarlaǵan bolatynbyz. Aqtóbe oblystyq prokýratýrasy búgin depýtattyń qandaı kúdikke ilikkenin málimdedi.
«Hromtaý aýdandyq prokýratýrasy osy jyldyń maýsym aıynda júrgizgen tekserý jumystarynan soń alaıaqtyq deregi boıynsha sot aldy tergeý jumystaryn bastady. Іs boıynsha aýyl sharýashylyǵyn qoldaý maqsatynda berilgen sýbsıdııany alaıaqtyq jolmen ıemdengen degen kúdikke ilikti.
Sonymen qatar, Qylmystyq kodekstiń «Bılik ókiline qatysty kúsh qoldaný» baby boıynsha kúdikti dep tanyldy. Biraq Baqytjan Erjanovty ustaý kezinde kúdikti quqyq qorǵaý organdary qyzmetkerlerine dene jaraqatyn saldy degen aıyp rastalmaıdy. Degenmen, B.Erjanovqa qatysty sharýa qojalyǵyndaǵy jumysshylarǵa dene jaraqatyn salý isi boıynsha derek tergelip jatyr. Sot-medıtsınalyq saraptama qorytyndysy shyǵaryldy.
Qylmystyq istiń bári bir óndiriske biriktirilip, Sybaılas jemqorlyqqa qarsy is-qımyl ulttyq bıýrosynyń Aqtóbe oblystyq departamenti tergeýge aldy. Sot B.Erjanovty qamaýda ustaý týraly bultartpaý sharasyna sanktsııa berdi. Ózge aqparattar tergeýge baılanysty jarııa etilmeıdi»,- dedi Aqtóbe oblysy prokýratýrasynyń apparat jetekshisi Jasulan Dáýlembaev.
