Qamaýǵa alynǵan Fılıppın vıtse-prezıdenti Sara Dýterte kepilmen bosatyldy
ASTANA. KAZINFORM – Fılıppın vıtse-prezıdenti Sara Dýtertege memlekettik qarajatty maqsatsyz paıdalandy jáne prezıdent Ferdınand Markosqa ashyq túrde qoqan-loqy kórsetti degen aıyp taǵylyp otyr, dep habarlaıdy Anadolu.
Fılıppın prezıdenti kishi Ferdınand Markos pen onyń jaqyndaryna «kisi óltiremin dep qoqan-loqy kórsetip, qastandyq jasaýǵa árekettendi» dep aıyptalǵan vıtse-prezıdent Sara Dýterteni qamaýǵa alý týraly order 4 qyrkúıekte berilgen. Keıin ol kepilmen bosatyldy.
Dýterteniń advokattarynyń biri Pol Loýrens Lım vıtse-prezıdenttiń úsh túrli aýyr qoqan-loqy kórsetý aıyby boıynsha 5 740 dollar kóleminde kepil tólegenin málimdedi.
Manıladaǵy Keson qalasynyń birinshi satydaǵy aýdandyq sotynan shyqqan Dýterte jaqtastarymen kezdesip, olardy qushaqtap, qamaýǵa alý týraly orderdiń kúshin joıý jónindegi sot sheshimin kórsetti.
Vıtse-prezıdent Sara Dýterte memlekettik qarajatty maqsatsyz paıdalandy, sondaı-aq prezıdent Markosqa, onyń jubaıy Lıza Araneta-Markosqa jáne óziniń nemere aǵasy, Ókilder palatasynyń spıkeri Martın Romýaldeske ashyq túrde qoqan-loqy kórsetti dep aıyptalǵan.
Dýterte ózine taǵylǵan aıyptardy joqqa shyǵaryp otyr.
Aıta keteıik, burynǵy prezıdent Rodrıgo Dýterteniń otbasy men odaqtastary Markos pen onyń ákimshiligin eks-prezıdentti zańsyz ustap, Halyqaralyq qylmystyq sottyń qamaýyna berdi dep aıyptaıdy. Onyń qyzy, vıtse-prezıdent Sara Dýterte de qazirgi prezıdenttiń eń ótkir synshylarynyń biri.
2025 jylǵy shildede Fılıppınniń Joǵarǵy soty Sara Dýtertege ımpıchment jarııalaýǵa tyıym salǵan edi.
Eske sala ketsek, buǵan deıin Fılıppındegi jemqorlyqpen baılanysty janjaldyń sońy jappaı narazylyqqa ulasqanyn jazdyq.
Sondaı-aq byltyr naýryzda Fılıppınniń eks-prezıdenti Rodrıgo Dýterte Gaagada qamaýǵa alynǵan edi.
Keıin Halyqaralyq qylmystyq sot Fılıppınniń eks-prezıdentin bosatýdan bas tartty.
