Qamaýdan shyqqan azamattarǵa jazasyn ótep bolǵannan keıin áleýmettik qamqorlyq jasaý kerek - Joǵarǵy sot tóraǵasy
ALMATY. Aqpannyń 8-i. QazAqparat /Erlik Erjanuly/ - Jaza taǵaıyndaǵan kezde jasóspirimder máselesine erekshe nazar aýdarý kerek.
Bul búgin Almatyda ótip jatqan "QR Qylmystyq saıasaty: jaı-kúıi jáne ony lıberalızatsııalaýdyń negizgi baǵyttary" dep atalatyn dóńgelek ústel jıynynda aıtyldy, dep habarlaıdy QazAqparat.
"Qamaýdan shyqqan azamattarǵa, onyń ishinde, ásirese jasóspirimder máselesine erekshe nazar qajet. Minezi, ómirge degen kózqarasy qalyptaspaǵan azamat bolǵandyqtan olarǵa jaza taǵaıyndaǵan kezde de qatty kóńil bólýimiz kerek. Óıtkeni kez kelgen adam óziniń ómirinde belgili bir satylardan ótedi", deıdi QR Joǵarǵy sot tóraǵasy Musabek Álimbekov. Onyń aıtýynsha, jasóspirim jastan kámelettik jasqa ótý barysynda ol birinshiden, bilim alýy kerek. Ekinshiden, qandaı da bir mamandyq ıesi bop shyǵýy qajet. Úshinshiden, kámelettik jasqa tolǵannan keıin otbasyn qurýy kerek. Osy negizgi máseleler ornyqpaǵan jaǵdaıda, ol qylmys jasaýǵa barady. Sondyqtan bul máselege jan-jaqty qaraýymyz kerek. "Qoǵamdyq pikirdi qalyptastyryp qoıamyz da, sonyń arnasymen kete beremiz. Birese qylmyskerlermen qatań kúresýimiz kerek deımiz de bárin túrmege qamaımyz. Birese bas bostandyǵynan aıyrylǵandar kóbeıip ketti deımiz. Osynyń bári máseleni tereń zerttep, zerdelep qaramaǵannyń saldary", deıdi Musabek Turǵynbekuly.
