Qamaýdaǵy 30 adamnyń ózderin zaqymdaǵany jalǵan - QR ІІM
ASTANA. QazAqparat - QR Іshki ister mınıstrliginiń Qylmystyq-atqarý júıesi komıteti Qaraǵandynyń tergeý ızolıatorynda denege zaqym keltirý faktileri bolǵanyn teriske shyǵardy. Aıta keteıik, mundaı málimet áleýmettik jelide taraǵan edi, dep habarlaıdy QazAqparat tilshisi.
«2018 jyldyń 3 shildesinde áleýmettik jelide AK-159/1 mekemesinde 30 sottalýshy ózderiniń qaryndaryn jardy degen aqparat tarady. Іshki ister mınıstrligi resmı túrde mundaı málimettiń shyndyqqa janaspaıtyndyǵyn málimdeıdi», - delingen atalǵan vedomstvonyń baspasóz qyzmeti taratqan aqparatta.
Degenmen, atap ótilgendeı, bir sottalýshy ishki tártip erejelerine moıynsunǵysy kelmeı, shegemen qasaqana denesine jaraqat salǵan. Oǵan Qaraǵandynyń memlekettik mekemeleriniń birinde alǵashqy medıtsınalyq kómek kórsetildi.
2 shilde kúni tergeý abaqtysyna oblystyq qoǵamdyq-baqylaý komıssııasynyń músheleri baryp, kameralardy aralap kórgen. Sonymen qatar kúdiktilerdi, aıyptalýshylar men sottalýshylardy jeke máseleleri boıynsha qabyldady. Mekemede ustaý jaǵdaıyna shaǵymdar men ótinishter túsken joq.
«AK-159/1 mekemesinde ahýal turaqty jáne baqylaýǵa alynǵan», - dep atap ótedi QR ІІM QAJK baspasóz qyzmetinen.
