Qamaýdaǵy 3 adamnyń qashyp ketýine jol bergen kinálilerge sot úkimi shyǵaryldy

Bul týraly búgin Astanada ótken brıfıngte Bas prokýratýranyń resmı ókili Jandos Ómirálıev málim etti.

«Qamaýda otyrǵan 3 adamnyń qashyp ketýine jol bergen Qylmystyq-atqarý júıesi komıteti Atyraý oblystyq departamentiniń tergeý oryny bastyǵynyń kezekshi-kómekshisi A. Súndetovty, rejımdik korpýs boıynsha aǵa baqylaýshy M. Іskendirovti, rejımdik korpýstyń kezekshi baqylaýshysy Ashat Ótekeshovty, sondaı-aq osy mekemeniń baqylap ótkizý beketiniń baqylaýshysy Ádilhan Jumaǵazıevti aıyptaý jónindegi qylmystyq istiń sotta qaralýy aıataldy»,-dedi resmı ókil. Atyraý qalalyq sotynyń bıylǵy jyldyń tamyzyndaǵy úkimimen qyzmettik ókilettigin teris paıdalanǵany úshin Súndetovke 3 jylǵa bas bostandyǵynan aıyrý jazasy berildi. Al óz mindetterine nemquraıdylyq tanytqan qalǵan qyzmetkerlerge qatysty 1 jyldan bas bostandyǵynan shekteý úkimi shyǵaryldy.

Atap aıtqanda, atalǵan qyzmetkerler ózderiniń qyzmettik mindetterin oryndaǵan kezde kezekshilik kestesi boıynsha jaýapty bolatynyna qaramastan, tıisti ruqsat pen buıryq bolmasa da rejımdik korpýs kameralarynyń esikterin ashyq qaldyryp, qamaýdaǵy adamdardyń qashyp ketýine yqpal etken. Atalǵan qashqyndar 1 táýlik ishinde ustalyp, tergeý orynyna qaıta qamaldy.