Qamaýda ustalyp otyrǵan qyrǵyz kásipkeri bosatyldy - QR ІІM
ASTANA. QazAqparat - Jambyldyq polıtseıler Qyrǵyzstan azamatyn urlap, bas bostandyǵynan aıyryp otyrǵan kúdiktilerdi anyqtady. Bul týraly QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat.
«Arnaıy operatsııa barysynda Jambyl oblystyq Іshki ister departamentiniń qyzmetkerleri urlanǵan Qyrǵyz Respýblıkasynyń jeke kásipkerin bosatyp aldy. Almaty qalasynyń úsh turǵyny qylmys jasady degen kúdikke iligip otyr», - dedi ol.
Onyń aıtýynsha, 17 sáýir kúni «Almaty-Taraz» tasjolynda jeke kólikke mingen kúdiktiler qyrǵyzstandyq mingen avtomobıldi májbúrlep toqtatqan. Osydan keıin ózderin polıtsııa qyzmetkeri retinde tanystyryp, ony urlap ketken.
«Operatsııa barysynda kórshi eldiń urlanǵan azamaty zardap shekken joq. Ustalǵandar ýaqytsha oqshaýlaǵyshqa qamaldy», - dedi Almas Sadýbaev.
