Qamaýda otyrǵan memlekettik qyzmetshiler týraly rolık daıyndalyp jatyr

NUR-SULTAN. QazAqparat –Jemqorlyq jasaǵany úshin bas bostandyǵynan aıyrylǵan memlekettik qyzmetshiler týraly vıdeorolıkter daıyndalyp jatyr. Bul týraly QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov málim etti, dep habarlaıdy QazAqparat tilshisi.

«Biz tutqyndaý faktilerin kórsetken bolatynbyz. Keshe ǵana ózimen bir qatarda jumys istep júrgen adamnyń ustalǵanyn kórý adamdarǵa oı salýy tıis. Men barlyq memlekettik qyzmetshilerdi oılanýǵa shaqyramyn. Kelisimge barmas buryn ózińiz jáne jaqyndaryńyz týraly oılanyńyz», - dedi Oljas Bektenov Aýyl sharýashylyǵy mınıstrliginde jemqorlyqqa qarsy sharalar jóninde ótken keńeste.

Onyń sózine qaraǵanda, agenttik jemqorlyq úshin jazasyn ótep jatqan memlekettik qyzmetshiler týraly rolıkter toptamasyn usynbaq.

«Ol rolıkterd memlekettik qyzmetshiler jazany ótep jatqan oryndardan suhbat berip, birneshe jyl úıinen alysta qalaı ómir súrip jatqanyn, zańsyz áreketteri úshin ókinetinin áńgimeleıtin bolady. Jaqynda ishki qaýipsizdik basqarmasy sottalǵan qyzmetkerimiz týraly rolık jasady. Biz ózimizge kelgende múlde qatalmyz. Taǵy bir tergeýshi Ońtústik Qazaqstan oblysynda 10 jylǵa bas bostandyǵynan aıyryldy. Qostanaı oblysynda da bir qyzmetker sottaldy. Onyń úkim oqylǵannan keıin áke-sheshesimen kezdesken sáti kadrǵa ilindi. Qart adamdardyń balasyn qushaqtap jylaǵanyn kórýdiń ózi aýyr. «Uldarynyń shyqqan sátin kóre ala ma» degen suraq týady», - dedi ol.